Բրիտանացի գրող Ջոան Ռոուլինգը Հարրի Փոթերի օրվա առթիվ բարեգործությանը նվիրաբերեց մեկ միլիոն ֆունտ (1,25 միլիոն դոլար): Այս մասին նա հայտարարել է Twitter-ի իր միկրոբլոգում:
«Երբ ծանր ժամանակներ են գալիս, ամենաշատը տուժում են աղքատներն ու խոցելի խմբերը, ուստի, ի պատիվ Հոգվարթսի ճակատամարտի, ես մեկ միլիոն ֆունտ կնվիրեմ բարեգործությանը»,- գրել է Ռոուլինգը:
Միջոցները բաժանվելու են բրիտանական երկու կազմակերպությունների միջև. մեկը օգնում է անօթևաններին, մյուսը՝ ընտանեկան բռնության զոհերին:
«Հարրի Փոթերը» վիպաշարք է, որ գրել է Ջոան Ռոուլինգը: Գրքերը Հոգվարթսի կախարդանքի և մոգության դպրոցում սովորող երիտասարդ հրաշագործ Հարրի Փոթերի, նրա ընկերներ Ռոն Ուիզլիի և Հերմիոն Գրենջերի արկածների տարեգրությունն են:
Հարրի Փոթերի համաշխարհային օրը նշվում է մայիսի 2-ին: Այս օրը, ըստ սյուժեի դիցաբանության, տեղի ունեցավ Հոգվարթսի դպրոցի համար մղվող մարտը, և ավարտվեց Երկրորդ կախարդական պատերազմը:
2019 թվականի դեկտեմբերին Ռոուլինգը աշխարհում ամենաբարձր վարձատրվող գրողների ցանկում զբաղեցրեց առաջին հորիզոնականը: Մասնագետները նրա եկամուտը գնահատել են 92 միլիոն դոլար։