ԱՄՆ նախագահ Դոնալդ Թրամփը ուրախացավ Հյուսիսային Կորեայի առաջնորդ Կիմ Չեն Ընի վերադարձով: Այս մասին նա գրառում է գրել Twitter-ի իր էջում:
Ամերիկացի առաջնորդը վերահրապարակեց երկար բացակայությունից հետո Հյուսիսային Կորեայի առաջնորդի մասին նորություններն ու լուսանկարները: «Անձամբ ես ուրախ եմ տեսնել, որ նա վերադարձել է և առողջ է»,- գրել է Թրամփը:
Մայիսի 2-ին համացանցում հայտնվեցին կադրեր պարարտանյութի գործարանի բացման արարողությունից, որտեղ Կիմ Չեն Ընը հանդիսավոր կտրում է ժապավենը: Հակառակ հիվանդության մասին լուրերին, ԿԺԴՀ ղեկավարը լուսանկարում առողջ տեսք ունի:
Ապրիլի 15-ին Կիմ Չեն Ընը բաց էր թողել պապի՝ ԿԺԴՀ հիմնադիր Կիմ Իլ Սունգի ծննդյան տոնակատարությունը: Նրա բացակայության պատճառով սկսեցին լուրեր պտտվել քաղաքական գործչի հնարավոր մահվան կամ հիվանդության մասին: Ենթադրվում էր, որ Հյուսիսային Կորեայի առաջնորդը չի կարողացել ինքնուրույն ոտքի կանգնել, նորմալ քայլել կամ գտնվում է «վեգետատիվ վիճակում»: