Այսօր՝ ժամը 20:40-ի սահմաններում, Աշոցքի «Տիրամայր Նարեկ» հիվանդանոցից Ճգնաժամային կառավարման ազգային կենտրոն ահազանգ է ստացվել, որ Աշոցքի տարածաշրջանի Սեպասար գյուղի վարչական տարածքում գտնվող գազալցակայանում պայթյուն է տեղի ունեցել: Դեպքի վայր մեկնած հրշեջ-փրկարարները պարզել են, որ գազալցակայանում լիցքավորման ժամանակ պայթել է «Վազ 21 21 ՆԻՎԱ» մակնիշի ավտոմեքենայի գազաբալոնը, իսկ լցակայանի աշխատակիցը տեղում մահացել է:
«Պայթյունը տեղի է ունեցել հենց գազ լիցքավորելու ժամանակ, «Վազ 21 21 ՆԻՎԱ» մակնիշի ավտոմեքենայում հրդեհ չի բռնկվել, բայց ավտոմեքենայի հետնամասն ու սրահը պայթել են, մասերի բաժանվել, ամբողջ տարածքում մեքենայի բեկորներն են տարածվել»,-SHANTNEWS.am-ին փոխանցեց Աշոցքի ՀՓՋ-ի հրամանատարի տեղակալ Հովհաննես Կոբելյանը:
Բացի «Վազ 21 21 ՆԻՎԱ» մակնիշի ավտոմեքենայից, պայթյունի հետևանքով էական վնասներ է կրել նաև հարևանությամբ լիցքավորվող մեկ այլ ավտոմեքենա:
«Վնասվել են դռները, ապակիները փշրվել են, մեքենայի թիթեղը ծռմռվել է»,- նշեց Հովհաննես Քոբելյանը։
Պայթյունի հետևանքով մահացած քաղաքացին Մեծ Սեպասար համայնքի բնակիչ, 1980 թվականին ծնված Միքայել Թովմասյանն է, որն աշխատում էր գազալցակայանում որպես լիցքավորող: Վնասվածքներ ստացած այլ քաղաքացիներ չկան:
«Տրամադրություն չունեմ, մահացածը համադասարանցիս էր, գյուղից գալիս, աշխատում էր գազալցակայանում:
Այսօր էլ հենց լիցքավորելու ժամանակ պայթյուն է եղել, ինքն էլ ստացած բազմաթիվ վնասվածքներից տեղում մահացել է»,- ասաց Աշոցք խոշորացված համայնքի ղեկավար Կարեն Մանուկյանը։