Վրաստանի ԱԳն աշխատակիցները Թբիլիսիում հանդիպել են Չինաստանի դեսպան Լի Յանի հետ՝ Թբիլիսիի մոտակայքում տեղակայված Ռիչարդ Լուգարի անվան ամերիկյան հետազոտական կենտրոնի գործունեության վերաբերյալ չինական ԶԼՄ-ներում հրապարակված նյութերի պատճառով։
«Հանդիպման ընթացքում կողմերը հատուկ ուշադրություն են դարձրել Վրաստանի հետ կապված ռուսական կեղծ տեղեկատվության տարածմանը, որը հատկապես ուժեղացել է COVID-19 համավարակի ընթացքում և անդրադարձել է բժշկական այնպիսի կարևոր հաստատության, ինչպիսին Լուգարի լաբորատորիան է։ Նշվել է, որ ցավոք, ՌԴ-ն շարունակում է միջազգային հանրությանը մոլորեցնելու իր փորձերը, որին հետևել են չինական ԶԼՄ-ների արձագանքները»,- նշված է ԱԳՆ հայտարարության մեջ։
Հիշեցնենք, որ Ռիչարդ Լուգարի անվան հետազոտական կենտրոնում լաբորատոր հետազոտություններ են իրականացվում, որոնք կապված են կենսաբանական զենքի ոլորտի հետ։ Դրանք իրականացնում է ԱՄՆ ցամաքային զորքերի բժշկական հետազոտական ստորաբաժանումը։
Ինչպես հաղորդել է ՌԵԳՆՈՒՄ-ը, Ռուսաստանը բազմիցս մտահոգություն է հայտնել ամերիկյան բժշկա-կենսաբանական լաբորատորիաները Ռուսաստանի սահմանի մոտակայքում տեղակայելու կապակցությամբ։