Ռուսաստանի ԱԳՆ պաշտոնական ներկայացուցիչ Մարիա Զախարովան մերժել է FBK-ի ղեկավար Ալեքսեյ Նավալնիի հետ բանավեճի համար հարթակ տրամադրելու «Էխո Մոսկվի» ռադիոկայանի առաջարկը: Նա հայտարարել է, որ հրաժարվում է բանավեճից՝ հակառակորդի «անազնվության» պատճառով:
Նրա խոսքով, Նավալնին բաց է թողել խոսելու հնարավորությունը, և նա չի հավատում, որ եթե խոսակցություն տեղի ունենա, «կրկին խաբեություն չի լինի»:
Նա նաև հավելել է, որ FBK-ի ներկայացուցիչն իր համար անընդունելի ձևաչափ ու օրակարգ է առաջարկել: Նավալնին, մինչդեռ, հայտարարել է, թե Զախարովան ինքն ավելի վաղ համաձայնել էր բանավեճի այդ պայմաններին:
Ապրիլի 30-ին FBK-ի հիմնադիրը ցանցում քննադատել էր Մարիա Զախարովայի վերջին հարցազրույցը, որտեղ նա պնդել էր, թե կորոնավիրուսի համաճարակի բռնկումից հետո հազարավոր ռուսաստանցիներ արտերկրում են մնացել և չեն կարողանում հայրենիք վերադառնալ սեփական անփութության հետևանքով:
