«Հրանտ Մաթևոսյան» մշակութային կենտրոն-թանգարանի շինարարական աշխատանքները սկսվել էին 2015-ին, պետք է ավարտվեին երկու-երկուսուկես տարվա ընթացքում, աշխատանքներն ավարտվել են, սակայն շենքը կիսատ է մնացել: Շահագրգիռ գերատեսչությունների հետ տեղի ունեցած հանդիպման և համատեղ քննարկման արդյուքնում ԿԳՄՍ նախարարությունը որոշում է կայացրել կազմակերպել «Հրանտ Մաթևոսյան» կենտրոն-թանգարանի երրորդ հարկի շինարարությունը: «Առաջին լրատվական»-ի հետ զրույցում «Հրանտ Մաթևոսյան» մշակութային հիմնադրամի տնօրեն Դավիթ Մաթևոսյանը նշեց, որ դա իրականում ոչ թե որոշում է, այլ գրություն, և առարկայական ոչ մի դրսևորում չի ստացել. «Դրանից հետո որևէ քննարկում տեղի չի ունեցել, որևէ պայմանագիր չի կնքվել: Ես ամրագրում եմ, որ վարչապետի հանձնարարականը չի կատարվել»:
«2018-ից հեղափոխությամբ իշխանության են եկել մարդիկ, ովքեր իրենց Հրանտ Մաթևոսյանի մշակութային ժառանգության իրավահաջորդն են համարում: Մաթևոսյանից մեջբերումներ անելու սովորույթը վարչապետից սկսվեց և շարունակվում է… «Մեր մտքերը բարի են, մեր խոսքերը բարի են, ո՞ւր են մեր գործերը»,- նշեց մեր զրուցակիցը:
Ինչպիսի՞ գնահատկան կտար Հրանտ Մաթևոսյանն այսօր ընթացող գործընթացներին: Անդրադառնալով այս հարցին, գրողի որդին նշեց. «Համոզված եմ, որ նա դառը կդատեր այսօրվա մասին, բայց միևնույն ժամանակ սիրով կխոսեր և կբացատրեր՝ ա՛յ որդի սա այսպես չէ: Համոզված եմ, որ մշակույթն է ոտքի կանգնեցնում կամ կործանում երկիր…»:
«Մեր հասարակությունը մարդակեր հասարակություն է, մենք այդ հասարակությունից ծնված ժողովուրդ ենք և դեպի մարդասիրություն ճեղք ենք բացում, հաճախ տեսնում ենք, որ մեր ճանկերը մարդակերի ճանկեր են, մեզ մարդասիրությամբ չեն օժտել»,- դեռևս 90-ականներին իր հարցազրույցներից մեկում ասել է Հրանտ Մաթևոսյանը:
Դավիթ Մաթևոսյանի դիտարկմամբ՝ Հրանտ Մաթևոսյանի ասած մարդակեր հասարակության իներցիան այնքան հզոր է, որ շարունակվում է:
Մանրամասն տեսանյութում:
