Արցախի արևելյան հատվածում տեղակայված հայկական առաջապահ դիրքերի ուղղությամբ հակառակորդը կիրառել է 60 մմ-անոց ականանետներ: Լեռնային Ղարաբաղի պաշտպանության նախարարությունը հայտնում է, որ միջադեպի արդյունքում ՊԲ ստորաբաժանումները որևէ կորուստ չեն կրել: Հայկական ստորաբաժանումների կողմից ձեռնարկված պատասխան գործողություններից հետո հակառակորդի ակտիվությունը ճնշվել է:
Արցախի ՊՆ-ն հայտնում է, որ սա 2019 թվականի հունիսից ի վեր ադրբեջանական զինուժի կողմից հայկական դիրքերի ուղղությամբ ականանետային զինատեսակի կիրառման առաջին դեպքն է:
«Միաժամանակ հավելենք, որ օրվա ընթացքում շփման գծի տարբեր հատվածներում հրադադարի ռեժիմի խախտման դեպքեր են արձանագրվել նաև հրաձգային այլ զինատեսակներից: Այս պահի դրությամբ առաջնային գծում իրավիճակը հանգիստ է: ՊԲ առաջապահ ստորաբաժանումները շարունակում են վստահորեն իրականացնել իրենց առջև դրված մարտական խնդիրը», – նշված է հաղորդագրությունում:
«Առաջին լրատվական»-ի հետ զրույցում Արցախի նախագահի աշխատակազմի ղեկավարի տեղակալ Դավիթ Բաբայանը, նախ, սահմանային իրավիճակի մասով նշեց, որ կայուն է, հայկական ուժերը շարունակում են վերահսկել ու պաշտպանել Արցախի անվտանգությունն ու անկախությունը։
Ինչ վերաբերվում է Ադրբեջանի զինված ուժերի կողմից 2019 թվականից ի վեր առաջին անգամ ականանետների կիրառման մասին, Բաբայանն ասաց՝ այն, որ Ադրբեջանը չէր կիրառում նման զենքեր, դեռ չէր նշանակում, որ այդ պետությունը փոխել էր ու վերանայել իր նպատակները։ «Մարտավարական իրավիճակից ելնելով էր Ադրբեջանը նման քայլեր անում, ոչ թե ռազմավարական։ Ադրբեջանը չի փոխվել։ Դուք գիտեք, նրանք Արցախի ապագան ինչպես են տեսնում, հայության ճակատագիրն ինչպես են տեսնում։ Որևէ բան չի փոխվել։ Մենք իլյուզիաներով չպետք է ապրենք։ Ոչ, ամենաանսպասելի ու ամենաանհարմար պահը օգտագործելու են մեզ վնաս հասցնելու համար։ Սա միանշանակ է»,- ասաց Դավիթ Բաբայանը։
Խոսելով հնարավոր լայնածավալ ռազմական գործողությունների հավանականության մասին, Բաբայանն ընդգծեց՝ Ադրբեջանի այս քայլը դեռ չի խոսում լայնածավալ ռազմական գործողությունների մասին։ «Նման քայլերը չեն վկայում լայնածավալ ռազմական գործողությունների մասին։ Բայց վկայում են նրանց ընդհանուր պատկերացումների մասին, որոնք անփոփոխ են։ Իհարկե, կարող են լինել լայնածավալ գործողություններ ցանկացած պահին, բայց դրա համար կան համապատասխան նախապայմաններ։ Նույնը եղել է Ապրիլյան պատերազմին նախորդող ամիսներին։ Երևում էր, որ ամեն ինչ գնում էր դեպի այլ զարգացում, որը դարձավ Ապրիլյան պատերազմ։ Այս պահի դրությամբ նման բաներ չկան, բայց մենք պետք է միշտ պատրաստ լինենք»,- մանրամասնեց Դավիթ Բաբայանը։
Նրա խոսքերով՝ պատրաստ լինելն իրենից ենթադրում է մի շարք հարթություններում լուրջ աշխատանք։ «Հիմա մեզ համար մի քիչ յուրահատուկ իրավիճակ է, քանի որ ներսում ունենք խնդիրներ։ Մենք գիտենք, որ սա մեր թշնամին է, նա չի թաքցնում, որ ուզում է մեզ ոչնչացնել, ջարդել, փշրել։ Հիշեք Փաշինյան-Ալիև վերջին հանդիպումը, ինչպես էր Ալիևը ներկայացնում պատմությունը։ Սա իրենց մոտեցումն է։ Ի՞նչ պետք է անենք, որպեսզի խուսափենք նման զարգացումներից։ Առաջին հերթին զինված ուժերը պետք է լինեն մարտական պատրաստվածության վիճակում։ Պետք է համախմբված լինենք ներսում։ Ադրբեջանն ակտիվորեն աշխատում է մեր ներսում խնդիրներ առաջացնելու ուղղությամբ։ Մեր ամենամեծ վտանգներից մեկը ներսն է։ Եթե, օրինակ, Հայաստանի Հանրապետությունում կան մարդիկ, որոնք արցախցիներին համարում են թուրքեր, թշնամանքը մեկը մյուսի հանդեպ։ Այդ տականքները քիչ են, բայց կան։ Եթե Արցախի Ազգային ժողովի նախկին պատգամավորը բերում է և ադրբեջանցու ազգային հերոսի գերեզմանաքարն է դնում։ Դուք պատկերացնո՞ւմ եք։ Այսպիսի խնդիր կան։ Պետք է ճիշտ աշխարհաքաղաքականություն վարենք։ Հազար ու մի խնդիր կա։ Միշտ պետք է աշխատենք այս ուղղությամբ։ Պետք է այնպես անել, որ ներքին մրցակցությունն ու հակասությունները մեզ չշեղեն ճանապարհից, ու հասնենք մի իրավիճակի, երբ արտաքին սահմանին չկարողանանք անել այն, ինչ պետք է անենք»,- տեսակետ հայտնեց Դավիթ Բաբայանը։
Ռազմական փորձագետ Մհեր Հակոբյանը, մեզ հետ զրույցում խոսելով սահմանային իրավիճակի մասին և հակառակորդի կողմից կիրառած ականանետների, ասաց՝ սա, ցավոք, սահմանային սովորական իրավիճակ է։ «Նոր պատերազմի հավանականությունը ես ցածր եմ գնահատում։ 60 մմ ականանետ է կիրառել հակառակորդը, դա նույնիսկ այն ուժեղ զենքը չի։ Դա սահմանային էպիզոդ է։ Ընթացիկ սահմանային իրավիճակ է, որը եղել է, կա ու միշտ էլ կլինի, ցավոք սրտի»,- ասաց ռազմական փորձագետը։
