«Ազատություն» ռադիոկայանին տված բացառիկ հարցազրույցում ԵՄ-ի՝ ընդարձակման և «Արևելյան գործընկերության» քաղաքականության գծով հանձնակատար Շտեֆան Ֆյուլեն հայտարարել է, որ ԵՄ-ը ցանկանում է մեծացնել իր ներգրավվածությունը ղարաբաղյան խնդրում և պատրաստ է անհրաժեշտ ֆինանսական միջոցներ տրամադրել՝ կարգավորմանը նպաստելու և տարածաշրջանը վերականգնելու համար.
«Այժմ մենք ավելի ու ավելի շատ գումարներ ենք ներդնում կողմերի միջև վստահությունը ամրապնդող միջոցառումներում՝ լինի դա Մերձդնեստրում, թե Ղարաբաղում: Սակայն դա միայն առաջին քայլն է: Բրյուսելը կարող է ավելին անել, քանի որ այժմ ԵՄ-ի արտաքին գերատեսչության կարողությունները ընդարձակվել են, իսկ խնդիրը կարգավորելու ցանկությունն ու պատրաստակամությունը՝ մեծացել:
ԵՄ-ն արդեն իսկ շատ ակտիվ դերակատարություն է ստանձնել իր հարևանությամբ գտնվող մեկ այլ հակամարտության՝ Մերձդնեստրի խնդիրը կարգավորելու հարցում, և պատրաստ է նույն քայլերը ձեռնարկել նաև Ղարաբաղի պարագայում:
Թեպետ Բրյուսելը պատրաստ է մեծացնել իր դերակատարությունը կարգավորման գործընթացում, սակայն գործող ձևաչափի՝ ԵԱՀԿ-ի Մինսկի խմբի փոփոխության հարց չի շրջանառվում։ Չեմ կարծում՝ մենք գործ ունենք Մինսկի խմբի այս կամ այն անդամին փոխարինելու հետ: Կարծում եմ՝ այս փուլում կողմերը և Մինսկի խումբն է, որ պետք է պայմաններ ստեղծեն ԵՄ-ի առավել մեծ ներգրավվածության համար: Սակայն մեր կողմից կա պատրաստակամություն, ինչպես նաև կարողությունների ընդարձակման հնարավորություն:
Մասնավորապես, այժմ և առաջիկայում ԵՄ-ը կարող է կողմերի միջև վստահությունը ամրապնդող միջոցառումներից բացի, էական աջակցության փաթեթ պատրաստել, երբ կողմերը կգան վերջնական համաձայնության:
Աջակցության այդ փաթեթը կներառի միջոցառումներ, որոնք կնպաստեն սոցիալական և տնտեսական զարգացմանը: Անհրաժեշտության դեպքում, ԵՄ-ը կարող է նաև վերականգնել ենթակառուցվածքները՝ որոշակի շրջաններ վերստին մյուս երկրների հետ կապելու համար:
Աջակցության այս փաթեթը կարող է ամրապնդել նաև քաղաքացիական հասարակության և այլ ուժերի դերը, ինչը շատ օգտակար կարող է լինել հաշտեցման ճանապարհին»։