Արցախի Հանրապետության նորընտիր նախագահ Արայիկ Հարությունյանը հանդիպում է ունեցել «Միասնական հայրենիք» կուսակցության նախագահ Սամվել Բաբայանի հետ: Ֆեյսբուքյան իր էջում Արայիկ Հարությունյանը տեղեկացրել է, որ կառուցողական քննարկում են ծավալել քաղաքական հնարավոր համագործակցության և այդ համատեքստում իրենց ծրագրային հիմնադրույթների համադրելիության շուրջ. «Արցախի խաղաղ և կայուն զարգացման գործում երկուստեք կարևորել ենք ներքին միասնականությունն ու առկա մարտահրավերներին համընդհանուր ջանքերով դիմագրավումը։ Պայմանավորվածություն ենք ձեռք բերել առաջիկայում շարունակել խորհրդակցությունները»:
Թեպետ սա Արայիկ Հարությունյանի նախաձեռնած հանդիպումների մեջ հերթականն է, բայց ուշագրավ է այն իմաստով, որ Բաբայանը նախընտրական առաջին փուլում աջակցում էր Արայիկ Հարությունյանի հիմնական մրցակցին՝ Մասիս Մայիլյանին։ Խորհրդարանական ընտրությունների արդյունքում Սամվել Բաբայանի ղեկավարած «Միասնական հայրենիք» կուսակցությունը խորհրդարանի թվով երկրորդ ուժն է, և հետաքրքիր է՝ համագործակցության ի՞նչ հեռանկարներ կան։
Արայիկ Հարությունյանի աջակիցներից իրավապաշտպան Կարեն Օհանջանյանն «Առաջին լրատվական»-ի հետ զրույցում ասաց, որ այս հանդիպման մեջ արտառոց ոչինչ չի տեսնում. «Երկրի ընտրված ղեկավարը պետք է հանդիպի բոլոր այն կազմակերպությունների ղեկավարների հետ, որոնք ներկայացված են քաղաքական հարթակում, և հատկապես խորհրդարան անցած երկրորդ ուժի ղեկավարի հետ։ Ես հակված եմ ենթադրելու, որ հազիվ թե պայմանավորվածություն ձեռք բերված լինի երկու քաղաքական ուժերի՝ «Ազատ hայրենիք» և «Միասնական հայրենիք» կուսակցությունների միասնական գործողությունների մասին։ Այս երկու ուժերը չափազանց տարբեր օրակարգ ունեն»։
Օհանջանյանը միևնույն ժամանակ նշեց, որ ընդհանուր առմամբ դրական վերաբերմունք ունի նման հանդիպումների և կոնսուլտացիաների շուրջ. «Բայց անձամբ ես ավելի զուսպ կլինեի այն ուժերին հանդիպելու հարցում, որոնք ոչ վաղ անցյալում ձգտում էին խարխլել պետականության հիմքերը։ Բացի այդ՝ ես կցանկանայի, որ մեր հասարակությունն ավելի իրազեկ լիներ՝ բոլոր հնարավոր ասեկոսեները բացառելու համար»։
Սամվել Բաբայանի աջակիցներից «Ազատամարտիկների դաշինքի» անդամ Ռազմիկ Պետրոսյանն «Առաջին լրատվական»-ի հետ զրույցում ասաց՝ հանդիպման մասին լրատվամիջոցներից է իմացել և դրական կարծիք ունի. «Մեր նպատակն Արցախում պաշտպանության, տնտեսության և մնացած բոլոր բնագավառների զարգացումն է։ Դրա համար անհրաժեշտ աշխատանք է տարվում՝ ի նպաստ Արցախի։ Երկու քաղաքական գործիչների ուղղվածությունն էլ նույնն է, երկուսն էլ ընդունում են «Արցախը Հայաստան է, և վերջ» կարգախոսը։ Ուստի կարծում եմ՝ ջանքերի համատեղումը տնտեսության, բանակի, Հայաստան-Արցախ կապի կոնտեքստում շատ դրական կլինի՝ ի շահ և ի նպաստ Հայաստանի ու Արցախի»։
Ռազմիկ Պետրոսյանը նաև հույս հայտնեց, որ բոլոր առողջ ուժերը ուրախ կլինեն միավորման համար. «Կարծես թե նախկինում մեր դեմ պայքարողներն այժմ ոչ թե խանդի զգացողություն ունեն, այլ ոգևորված են, դրական տրամադրվածություն ունեն»։
Դիտարկմանը, թե փաստորեն չի բացառվում միավորումը, Ռազմիկ Պետրոսյանն ասաց. «Կարծում եմ՝ կլինի համագործակցություն, ծրագրերի համատեղում։ Եթե նախկինում կային ծրագրային մոտեցումների տարբերություններ, նման հանդիպումներ ընթացքում կլինեն ընդհանրացումներ, ու համատեղ ծրագրերը կյանքի կկոչվեն»։
