Վարչապետ Նիկոլ Փաշինյանը որոշում է կայացրել, համաձայն որի՝ Սահմանադրական փոփոխությունների հանձնաժողովը իր աշխատանքը պետք է ավարտի 2020թ. դեկտեմբերի 31-ին:
ԱԺ պետաիրավական հանձնաժողովի նախագահ Վլադիմիր Վարդանյանը «Առաջին լրատվական»-ի հետ զրույցում նկատեց, որ այս ժամկետն իրատեսական է. «Մենք աշխատում ենք գրեթե ամեն շաբաթ մեկ նիստ գումարելու տրամաբանությամբ, աշխատում ենք հեռավար եղանակով, և այս պահի դրությամբ այստեղ որևէ խնդիր չկա: Այլ բան է, թե մենք որքանով կկարողանանք այդ ժամանակահատվածում պատրաստել բոլոր անհրաժեշտ փաստաթղթերը, որոնք թույլ կտան նշանակել հանրաքվե»:
Վլադիմիր Վարդանյանը հավելեց, որ իրենք աշխատում են ոչ այնքան ընդդիմություն-իշխանություն սկզբունքով, այլ որպես մասնագիտական հանձնաժողով փորձում են լսելի դարձնել ցանկացած կարծիք:
«Խոսքն այն մասին է, թե ինչպես բալանսավորել պետական իշխանության մարմինների լիազորությունները՝ ապահովելու համար իշխանության տարբեր թևերի միջև ներդաշնակությանը: Այս հարցի վերաբերյալ մենք բազում քննարկումներ ենք ունեցել և շարունակում ենք ունենալ, որովհետև ի վերջո մեզ պետք է Սահմանադրություն, որը արտացոլում է իշխանությունների տարանջատման այնպիսի բալանս, որը հնարավորություն կտա Հայաստանին ժողովրդավարական ուղով շարժվել դեպի ապագա»,- ի պատասխան սուպերվարչապետությանն առնչվող հարցին՝ ասաց Վլադիմիր Վարդանյանը:
Մանրամասն՝ տեսանյութում:
