Վրաստանի նախկին նախագահ, Ուկրաինայի փոխվարչապետի պաշտոնի թեկնածու Միխայիլ Սահակաշվիլին Facebook սոցիալական ցանցում հրապարակել է իր մոր տեսաուղերձը:
Գիուլի Ալասանիան պատասխանել է ուկրաինացի լրագրող Սերգեյ Պոյարկովին, որը «Zik» հեռուստաալիքի եթերում կասկած է հայտնել փողերի ծագման մասին, որոնցով Սահակաշվիլին տուն է կառուցել Կիևում: Լրագրողը ենթադրել է, որ Սահակաշվիլիի մայրը «նույնիսկ եթե չուտեր, չխմեր և զուգարան չգնար, միևնույնն է չէր կարող իրեն նման շքեղ առանձնատուն թույլ տար»:
Ալասանիան ի պատասխան հայտարարել է, որ տունը մեծ չէ, իսկ իր աշխատավարձը ամսական 10 հազար դոլար է:
«Ես հենց նոր տեղեկացա, որ ինչ-որ Պոյարկով կասկած է հայտնել, որ հողատարածքը, որի վրա կառուցվել է առանձնատունը, ես եմ գնել: Բանն այն է, որ ես պրոֆեսոր եմ, Վրաստանի ամենամեծ մասնավոր համալսարաններից մեկի՝ University of Georgia-ի հիմնադիրը և նախագահը: Արդեն երկար ժամանակ իմ աշխատավարձը կազմում է միջինում 10 հազար դոլար: Տունը կառուցվել է երեք տարվա ընթացքում: Հողատարածքը ընդամենը 100 քմ է: Սա մեծ տուն չէ, ուստի կարծում եմ, որ ես կարող էի ինձ թույլ տալ նման տուն կառուցել: Իմ ամբողջ կյանքի ընթացքում ես ապրել եմ ազնիվ աշխատանքով, նույնն է արել նաև իմ որդին: Այնպես որ, ես ոչ մի դեպքում թույլ չեմ տա արատավորել նրա և իմ անունը»,- հայտարարել է Սահակաշվիլիի մայրը:
Սահակաշվիլին տեսահոլովակը հրապարակել է «ողջույն Պորոշենկոյի տականքին հենց իմ մայրիկից» խորագրով: Միևնույն ժամանակ, 2018-ին նա հաղորդել է, որ «մայրը վաճառել է Թբիլիսիի կենտրոնում գտնվող իր ծնողների տունը և փոքր հողամաս է գնել Կիևի մերձակայքում»: