Հյուրանոցները բացելուց հետո զբոսաշրջիկների համաճարակաբանական անվտանգությունն ապահովելու համար թուրք հյուրանոցները կհրաժարվեն շվեդական սեղանից, հայտնել է Ahaber-ը:
«Թուրքիայի Մշակույթի եւ տուրիզմի նախարար Մեհմեդ Էրսոյը ներկայացրել է հյուրանոցների նոր կանոնները, որոնք ուժի մեջ կմտնեն մայիսի վերջին ներքին տուրիզմի վերագործարկումից հետո: Համաձայն նորամուծություններին, «շվեդական սեղանի» համակարգով սնունդ այլեւս չի լինի:
Ենթադրվում է, որ այն կփոխարինվի համապարփակ ընտրացանկով», – գրում է պարբերականը:
Ինչպես նշում է պարբերականը, նախևառաջ կբացվեն այն հյուրանոցները, որոնք կորոնավիրուսի բացակայության վերաբերյալ վկայագրեր կունենան: Սկզբում, նրանք հյուրեր ընդունելու համար կօգտագործեն սենյակների միայն կեսը: Բացի այդ, հյուրանոցների ներսում գտնվող ռեստորանները պետք է ապահովեն սոցիալական հեռավորություն: Որոշ հյուրանոցներ կարող են ընտանիքներին առաջարկել տնակներ:
Որոշակի միջոցառումներ կձեռնարկվեն ոչ միայն հյուրանոցներում, այլև սրճարաններում, ռեստորաններում և առողջարանային օբյեկտներում: Այսպիսով, սպասարկող անձնակազմի համար կլինեն հետեւյալ պահանջները՝ նրանք պարտավոր են նախքան աշխատանքի անցնելը բժշկական զննություն անցնել, աշխատել ձեռնոցներով և դիմակներով, որոշ դեպքերում կարող է օգտագործվել հատուկ պաշտպանիչ հագուստ:
Նոր կանոնները կկիրառվեն նաեւ զբոսանավերի վրա՝ սոցիալական հեռավորությունն ապահովելու համար նավի վրա ուղևորների քանակը կնվազեցվի:
«Պատրաստվում ենք տեղական տուրիզմը վերաբացել մինչև մայիսի 15-ը: Կարծում եմ, որ բնակարաններն ու բուտիկ հյուրանոցները կլինեն ամենատարածված բնակեցման օբյեկտները: Հարկ է նշել, որ գները կարող են բարձրանալ», – Ուլայի քաղաքապետ Իշաբիլ Աքայանին է մեջբերել Ahaber-ը:
Հրապարակման համաձայն, Թուրքիան ակնկալում է, որ արտասահմանյան հյուրեր կսկսի ընդունել օգոստոսի վերջին: Օդանավերում զբոսաշրջիկների համաճարակաբանական անվտանգությունն ապահովելու համար կկազմվի նստատեղերի հատուկ կարգ, որի ժամանակ ուղևորների մեջտեղի նստարանը կմնա ազատ:
