Հոլանդիայի ֆուտբոլի ֆեդերացիան որոշում է կայացրել չեղարկել ազգային առաջնության մյուս հատվածը համավարակի պատճառով: Հոլանդիայի 2019/20 թվականի մրցաշրջանը հաղթող չի ունենա: Բարձրագույն խմբից ոչ մի ակումբ դուրս չի մնա, իսկ եվրագավաթներին ակումբները կմասնակցեն առաջնությունում մինչև դադարը զբաղեցրած տեղերը հաշվի առնելով: Հոլանդիայի առաջնությունը դադարեցվել էր 25-րդ տուրում: Առաջատարը «Այաքսն» էր, երկրորդ տեղում՝ ԱԶ-ն, իսկ եռյակը եզրափակում էր «Ֆեյենորդը»:
Այս որոշումը մեծ աղմուկ է բարձրացրել թե՛ Հոլանդիայում և թե՛ եվրոպական ֆուտբոլում։ Նիդեռլանդների կառավարության որոշման համաձայն՝ մինչև այս տարվա սեպտեմբերի 1-ը արգելվել են բոլոր զանգվածային միջոցառումները, այդ թվում՝ նաև սպորտային մրցաշարերը։
Հիշեցնենք, որ ավելի վաղ հայտնի էր դարձել, որ ՈՒԵՖԱ-ն իր անդամ երկրների համար վերջնաժամկետ է սահմանել ազգային առաջնություններն ավարտելու համար։ Մասնավորապես, մինչև հուլիսի 31-ը եվրոպական կառույցի անդամ երկրները պետք է ավարտին հասցնեն ներքին առաջնությունները։ Ավելին, օգոստոսին Չեմպիոնների և Եվրոպա լիգայի 2019/2020 թթ. խաղարկությունն ավարտին հասցնելուց հետո ՈՒԵՖԱ-ն մտադիր է նույն ամսին կազմակերպել արդեն 2020/2021 թթ. Չեմպիոնների լիգայի ու Եվրոպա լիգայի որակավորման փուլերը։ Ապրիլի 1-ին Բելգիայի ֆուտբոլի ֆեդերացիան որոշում էր կայացրել առաջնությունը ժամկետից շուտ ավարտելու մասին, ինչի արդյունքում չեմպիոն էր հռչակվել «Բրյուգեն»։ Եվ ահա այս քայլի հետևանքով Բելգիան ՈՒԵՖԱ-ի կողմից կենթարկվի լուրջ պատժամիջոցների։
Ու փաստորեն, անտեսելով ՈՒԵՖԱ-ի հորդորը, Հոլանդիայի ֆուտբոլի ֆեդերացիան գնաց կտրուկ որոշման։ Հոլանդական այն ակումբները, որոնք հնարավորություն էին պահպանում նվաճելու եվրագավաթների ուղեգրեր, հայտարարել են, որ բողոքարկելու են երկրի ֆեդերացիայի այս որոշումը։ Հոլանդական գրեթե բոլոր թիմերը հորդորել են վերանայել այն և թույլ տալ շարունակել պայքարն առաջնությունում։ Եթե մինչև սեպտեմբերի 1-ը հոլանդական ակումբները չվերսկսեն մրցաշրջանը և հանդիպումներ չանցկացնեն, ենթադրաբար չեն մասնակցի նաև Չեմպիոնների և Եվրոպա լիգաներին։ Արդյունքում եվրագավաթները և ՈՒԵՖԱ-ն կհայտնվեն ըստ էության անելանելի վիճակում։
Արդեն իսկ տեսանելի է վտանգը թե՛ չավարտված և թե՛ գալիք մրցաշրջանի վերջնականապես տապալման։ ՈՒԵՖԱ-ն և ՖԻՖԱ-ն ամեն գնով փորձում են փրկել ֆուտբոլը փոշիացումից, բայց… Հոլանդիայի և Բելգիայի օրինակը խոսում է այն մասին, որ միայն ֆուտբոլային կառույցների ջանքերը բավարար չեն։ Կա նաև քաղաքական գործոնը, որն ըստ էության առանցքային է։ Մասնավորապես, հաշվի առնելով համավարակի հետևանքով ստեղծված իրավիճակը՝ պետությունների իշխանություններն ուղղակի չեն ցանկանում ռիսկի դիմել։ Հոլանդիայի ֆուտբոլի ֆեդերացիայի որոշումն արդեն իսկ ծանր հարված էր եվրոպական ֆուտբոլին։ Հավանականությունը մեծ է, որ Հոլանդիայի օրինակին կհետևեն մյուս երկրները։ Այս դեպքում, ըստ մոտավոր հաշվարկի, ֆուտբոլային ակումբների մոտ 40 տոկոսն ուղղակի կլուծարվի։
Վերջնաժամկետ սահմանելով ազգային ֆեդերացիաների համար՝ ՈՒԵՖԱ-ն ըստ էության պարզ լեզվով հասկացրել էր հետևյալը. եթե առաջնությունները չվերսկսվեն, ու հետևաբար չեղարկվեն եվրագավաթների մրցաշարերը, ակումբները, ինչպես նաև ՈՒԵՖԱ-ն, կզրկվեն ֆինանսական հոսքերից, ինչը կհանգեցնի կոլապսի։ Ահագնացող ֆինանսատնտեսական ճգնաժամի ֆոնին էլ ֆուտբոլի փրկության հարցը կարող է մղվել երկրորդ պլան։ Ֆուտբոլային կառույցներին, ինչպես նաև ակումբներին եկամուտ ապահովում են խոշոր մրցաշարերը և մասնավորապես հեռուստահեռարձակումները։ Ակումբներն իրենց հերթին սնվում են նաև հանդիպումների տոմսերի և թիմի ատրիբուտների վաճառքից գոյացած գումարներով։ Շատ ակումբներ արդեն իսկ զրկվել են հովանավորներից։ Կարճ ասած, չկա ֆուտբոլ՝ չկա գումար։
Օրեր առաջ հայտնի դարձավ, որ Ֆուտբոլի միջազգային ֆեդերացիան՝ ՖԻՖԱ-ն, ֆինանսական օգնություն կտրամադրի ազգային ֆեդերացիաներին: ՖԻՖԱ-ն իրեն անդամակցող բոլոր ֆեդերացիաներին միասին կտրամադրի 150 միլիոն դոլար: Անդամ բոլոր ֆեդերացիաներից յուրաքանչյուրը կստանա մոտ կես միլիոն դոլար: Այս քայլով ՖԻՖԱ-ն մտադիր է ֆինանսական ճգնաժամից փրկել ազգային ֆեդերացիաներին, որոնք ևս զրկվել են ֆինանսական հոսքերից։ Բայց ակումբների խնդիրը շատ ավելի լուրջ է։
Նշենք, որ Հայաստանն այն բացառիկ երկրների շարքում է, որտեղ ակումբներին հնարավորություն է տրվել մարզվելու։ Մասնավորապես, թիմերի ֆուտբոլիստներն ու այլ աշխատակիցներ թեստավորվելուց հետո ապրիլի 23-ից վերսկսել են մարզումները։ Սա ՀՀ կառավարության կողմից պատասխանատու և կարևոր քայլ է ֆուտբոլը անդունդից դուրս բերելու հարցում։
Մեր երկրում արտակարգ դրություն է հայտարարված մինչև մայիսի 14-ը, և դեռևս հայտնի չէ՝ կերկարաձգվի՞ այն, թե՞ ոչ։ Մեկ շաբաթ անց ՀՖՖ-ն կքննարկի Հայաստանի Բարձրագույն և Առաջին խմբերի առաջնությունների, ինչպես նաև գավաթի խաղարկության վերսկսման հարցը։ Հնարավոր ժամկետներն են մայիսի երկրորդ կես-հունիսի սկիզբը՝ կախված Հայաստանում արտակարգ դրության ռեժիմի ավարտից և մի շարք այլ հանգամանքներից։