Իրանի կողմից արձակված ռազմական արբանյակը հազիվ թե կարողանա հետախուզական տվյալներ փոխանցել Իսլամական հանրապետության զինված ուժերին, հաղորդում է ՏԱՍՍ-ը՝ ԱՄՆ-ի Տիեզերական ուժերի հրամանատար գեներալ Ջոն Ռայմոնդի հայտարարությանը հղումով:
«Իրանը հայտարարում է, որ կարող է նկարահանումներ իրականացնել: Իրականում դա տիեզերքում պտտվող տեսախցիկ է»,- ասել է Ռայմոնդը:
Նրա խոսքով, ԱՄՆ զինված ուժերն անընդհատորեն հետևում են տիեզերքում գտնվող Իրանի օբյեկտներին:
Ավելի վաղ, Իրանի ղեկավարությունը հայտարարել էր, որ գործարկել է «Նուր» առաջին ռազմական արբանյակը: Այն ուղեծրի 425 կիլոմետր է դուրս բերվել «Քասեդ» երկաստիճան կրող-հրթիռի օգնությամբ:
Այս փորձը քննադատվել է արևմտյան երկրների կողմից: Ըստ նրանց հայտարարությունների, Իրանի գործողությունները չեն համապատասխանում ՄԱԿ-ի Անվտանգության խորհրդի 2231 բանաձևին, որով Իրանին արգելվում է հրթիռներ արձակել: ՄԱԿ-ի ԱԽ-ի 2231 բանաձևը ստորագրվել է Իրանի, Ռուսաստանի, ԱՄՆ-ի, Չինաստանի, Ֆրանսիայի և այլ երկրների կողմից 2015 թ.-ի հուլիսի 20-ին: Այն Թեհրանին արգելում է ռազմական նպատակներով հրթիռային և միջուկային ծրագրի զարգացումը: