Բրյուսելում 2008թ. ՆԱՏՕ-ի գագաթնաժողովի նախօրեին Գերմանիան դիմադրել է Ուկրաինայի միացմանը ՆԱՏՕ-ին՝ մտավախություն ունենալով, որ Ռուսաստանը խիստ բացասական վերաբերմունք կունենա դրա վերաբերյալ: Այս մասին հաղորդում է KyivPost-ը՝ հղում կատարելով WikiLeaks-ի կողմից հրապարակված ամերիկյան դիվանագիտական նամակագրությանը:
Նշվում է, որ Ուկրաինան այդ ժամանակ անհամեմատ ավելի մոտ էր անդամակցությանը ՆԱՏՕ-ին, քան երբևէ: 2008թ. նա հայտ էր ներկայացրել միանալու անդամակցությանն աջակցության ծրագրին, ինչը շուտով ստացել էր ԱՄՆ աջակցությունը: Ծրագրի քննարկումը նախատեսված էր ապրիլ ամսին Բուխարեստում, սակայն Ֆրանսիան և Գերմանիան կտրուկ դեմ են արտահայտվել: Այդուհանդերձ, փաստաթղթերը ստորագրվել էին, սակայն դրանց քննարկումը տեղափոխվել էր դեկտեմբեր:
Կայքը գրում է՝ թվում է, թե 2008թ. օգոստոսի վրաց-ռուսական պատերազմից հետո եվրոպացիները պետք է հասկանային, որ անհրաժեշտ է ապահովել Վրաստանի և Ուկրաինայի անդամակցությունն այդ կառույցին: Այդ ժամանակ Ֆրանսիան արդեն սկսել էր կասկածել իր դիրքորոշմանը, սակայն Գերմանիան անդրդվելի էր:
Նա միայնակ համոզել է ՆԱՏՕ-ի անդամներին, որ քաղաքական առումով «մղձավանջային» Ուկրաինայի անդամակցությունը կսրի հարաբերությունները ՆԱՏՕ-ի և Ռուսաստանի միջև, ինչը բացասաբար կազդի Աֆղանստանում ՆԱՏՕ-ի օպերացիայի վրա: Այս բացահայտումներն արված են ԱՄՆ դիվանագիտական փաստաթղթում ոմն Ջեֆ Ռատկեի կողմից: