«Առաջին լրատվական»-ի զրուցակիցն է Թբիլիսիի Black Sea Press գործակալության գլխավոր խմբագիր, քաղաքագետ Գելա Վասաձեն:
– Պարոն Վասաձե, տարածաշրջանում կարծես թե ամենալավ ցուցանիշը կորոնավիրուսի վարակի տարածման առումով Վրաստանում է։ Ո՞րն է վրացական փորձի բացառիկությունը։
– Մենք շատ քիչ տեղեկատվություն ունենք վիրուսի մասին: Բացի այդ, ձեր հարցին պետք է պատասխանեմ ոչ թե ես, այլ վարակաբանը: Միայն կասեմ, որ մենք հրաշալի և անձնազոհ բժիշկներ ունենք, ինչի համար նրանց մեծ շնորհակալություն: Թե որքանով է դա յուրօրինակ, ես չգիտեմ, թեև ցանկացած փորձ էլ յուրատեսակ է:
– Թեև թվերը վատ չեն, սակայն արտակարգ դրությունը երկարաձգվեց մինչև մայիսի 22-ը։ Ինչո՞ւ։
– Մեզ բացատրում են, որ դա անհրաժեշտ է նրա համար, որ չլինի հիվանդացության կտրուկ աճ: Այդպես է, թե ոչ՝ չեմ կարող ասել, դա իմ ոլորտը չէ: Բայց կարծում եմ, որ մեզ օդի պես անհրաժեշտ է դուրս գալ այս կարանտինային արգելափակումից, և որքան շուտ, այնքան լավ՝ իհարկե հետևելով համապատասխան սանիտարական նորմերին: Իսկ դա դեռևս չի նկատվում:
– Որքանո՞վ են իրական ներկայացվում թվերը։ Բացառո՞ւմ եք, որ թվերի առումով որևէ բան թաքցվի։
– Նայած թե ինչ թվերի մասին է խոսքը: Եթե խոսքը վարակված անձանց թվի մասին է, ապա այն համարժեք է անցկացված թեստերի թվին: Քիչ թեստեր՝ քիչ հաստատված դեպքեր: Ինչ վերաբերում է հիվանդներին, առավել ևս՝ մահացածների թվին, ես բացառում եմ ցուցանիշները թաքցնելու հնարավորությունը: Վրաստանի պես երկրում որևէ բան թաքցնելը ծայրահեղ դժվար է, իսկ վիրուսի դեպքում դա պարզապես անհնար է:
– Ընդհանրապես տնտեսական ինչպիսի՞ վնասներ է կրում Վրաստանը։ Կառավարության իրականացրած ծրագրերը որքանո՞վ են մեղմում քաղաքացիների սոցիալ-տնտեսական իրավիճակը։
– Այստեղ պետք է լավ հասկանալ, որ աշխարհի բոլոր տնտեսությունները փլուզված են, այլ կերպ չէր էլ կարող լինել, և Վրաստանն այստեղ բացառություն չէ: Բայց զարգացած երկրները կարող են այդ տնտեսական աղետը լցնել փողով, իսկ մենք նման հնարավորություն չունենք, ու դա պրոբլեմ է:
– Վրաստանն արդյոք մոտեցե՞լ է պիկին։
– Դա ոչ ոք չգիտի, կարծում եմ՝ նույնիսկ բժիշկները: Հետևաբար պատասխանն է՝ ոչ: