Գլխավոր դատախազության կայքէջի տարածած հաղորդագրության համաձայն՝ Աղվան Հովսեփյանը երեկ դիմել է վարչապետ Տիգրան Սարգսյանին՝ առաջարկելով քննարկման առարկա դարձնել Գավառի քաղաքապետ Գուրգեն Մարտիրոսյանի (ըստ որոշ լուրերի՝ Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանի եղբոր) հետագա պաշտոնավարման նպատակահարմարության հարցը՝ նկատի ունենալով ՀՀ հատուկ քննչական ծառայության վարույթում քննվող քրեական գործով հիմնավորված փաստական հանգամանքները:
Մասնավորապես, ՀՔԾ-ում քննվող քրգործով պարզվել է, որ Գեղարքունիքի մարզի Գավառի քաղաքապետ Գուրգեն Մարտիրոսյանը, տեղեկանալով իր ազգականներ՝ եղբայրներ Արամ և Արթուր Մարտիրոսյանների, ինչպես նաև Հրաչյա Պետրոսյանի կողմից Գավառ քաղաքի Ազատության փողոցում գտնվող «Պարտեզ» խանութի մոտակայքում նույն քաղաքի բնակիչներ Հակոբ և Հովսեփ Հովհաննիսյանների ու Սպարտակ Զարգարաղոյանի նկատմամբ սպանության փորձ կատարելու մասին, փորձել է օժանդակել նրանց փախուստին և իրավապահներից թաքցնելու նպատակով՝ դեպքից անմիջապես հետո նախապես չխոստացված էական օգնություն ցուցաբերել վերջիններիս:
Նախաքննական մարմնի գնահատմամբ՝ Գուրգեն Մարտիրոսյանը կատարել է առանձնապես ծանր հանցագործության պարտակում՝ հանցանք կատարած անձանց, ինչպես նաև հանցագործության կատարման գործիքների նախապես չխոստացված պարտակում, և նրան մեղադրանք է առաջադրվել ՀՀ քր.օրի 334-րդ հոդվածի 1-ին մասով: Նկատի ունենալով, որ «Հայաստանի Հանրապետության անկախության հռչակման 20-րդ տարեդարձի կապակցությամբ համաներում հայտարարելու մասին» ԱԺ-ի 2011թ. մայիսի 26-ի որոշման 6-րդ կետը նախատեսում է կարճել նախաքննության մարմինների վարույթում գտնվող այն քրեական գործերը, որոնցով անձինք մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ՝ ոչ ավելի, քան 3 տարի ժամկետով ազատազրկում, այն որ ՀՀ քր.օրի 334-րդ հոդվածի 1-ին մասով նախատեսված ազատազրկման ժամկետը չի գերազանցում 3 տարին, մեղադրյալ Գուրգեն Մարտիրոսյանը խնդրել է իր նկատմամբ քրեական հետապնդումը դադարեցնել համաներման ակտի ընդունման կապակցությամբ, ինչը և արել է նախաքննական մարմինը և վարչապետին առաջարկել քննարկել նրա հետագա պաշտոնավարման նպատակահարմարության հարցը: «Ինչ վերաբերում է Արամ և Արթուր Մարտիրոսյաններին, Հրաչյա Պետրոսյանին, ապա նրանք հայտնաբերվել են, և նախաքննությամբ ձեռք բերված ապացույցների հիման վրա նրանց մեղադրանք է առաջադրվել (սպանության փորձի և ապօրինի զենք պահելու, կրելու համար.- հեղ.): Նրանց մասով քրեական գործն անջատվել է առանձին վարույթ և ուղարկվել դատարան՝ ըստ էության քննելու համար»,- հայտնում է գլխավոր դատախազությունը:
Հիշեցնենք, որ ՀՔԾ-ում քննվող գործը վերաբերում է ՀՀ ոստիկանության ՔՀԳՎ նախկին պետ, ոստիկանության գեներալ-մայոր Հովհաննես Թամամյանին: ՀՔԾ-ն նրան մեղադրանք է առաջադրել ՀՀ քր.օրի 308-րդ հոդվածի 2-րդ մասով նախատեսված հանցագործության համար (պաշտոնեական լիազորությունները չարաշահելը, որն անզգուշությամբ առաջացրել է ծանր հետևանքներ): Իսկ քննվող գործի «ջրված» դրվագներից է ինչպես 2010 թ. մայիսի 12-ին Երևանի Կոմիտասի պողոտայի 17-րդ և 19-րդ շենքերի մոտ կատարված Խաչիկ Մկրտչյանի սպանության գործը, այնպես էլ Գեղարքունիքի մարզի Գավառի քաղաքապետ Մարտիրոսյան Գուրգենի դինաստիայի կատարած «հերոսությունները»: Դրանցից մեկը հաղորդագրության մեջ նշված դեպքն է. Արամ և Արթուր Մարտիրոսյանները և Հրաչյա Պետրոսյանը 2009-ի նոյեմբերի 5-ի երեկոյան Ազատության փողոցում՝ մարդաշատ վայրում, սև «ջիպի» պատուհանից կրակահերթեր էին արձակել «ՎԱԶ-2107» մակնիշի մեքենայի մեջ գտնվող հայր և որդի Հակոբ («Փռի Կակո») և Հովսեփ Հովհաննիսյանների և Սպարտակի ուղղությամբ: Կրակահերթերից հրազենային վնասվածքներ էին ստացել 23-ամյա Հովսեփը և 21-ամյա Սպարտակը: Գավառում շրջանառվող տեղեկությունների համաձայն՝ կրակողները ոչ միայն դատավորի, այլ նաև Գավառում հայտնի հեղինակություն Պալի Անդոյի՝ Անդրանիկ Մարտիրոսյանի տղան և նրա քրոջ որդին են եղել: Եվ ահա այդ դեպքից հետո Մարտիրոսյան եղբայրները մոտ կես տարի թաքնվել էին նախաքննական մարմնից, մինչև 300,000 դոլարով գործը «ջրելու» մասին պայմանավորվածություն էր ձեռք բերվել Թամամի հետ: Սակայն երբ Թամամին բռնել էին՝ այդ գործը «ջրելու» փողը ջուրն էր «լցվել», իսկ մարտի 14-ին կրակողները կալանավորվել էին:
Սակայն Մարտիրոսյան դինաստիայի անունը մեկ այլ քրեական գործով էլ է շոշափվում. 2009-ի հունիսի 20-ին, ժամը 22:00-ի սահմաններում, Գավառի Զորավար Անդրանիկի փողոցում գտնվող «Ալիկ» ՍՊԸ-ին պատկանող ռեստորանում 44-ամյա Պալի Անդոն ծեծել էր ՌԴ քաղաքացի, 25-ամյա Իլյա Ղ.-ին, ով դեմքի վնասվածքներով տեղափոխվել էր Գավառի հիվանդանոց, սակայն հայտարարել էր, որ դրանք ստացել է իրենց բակում վայր ընկնելու հետևանքով: Իլյա Ղ.-ն բուժօգնություն ստանալուց հետո՝ հունիսի 22-ին մեկնել էր Մոսկվա, իսկ հաջորդ օրը ընկերների՝ ՌԴ քաղաքացիներ՝ 27-ամյա Ավեդիս Ս.-ի և Արթուր Ղ.-ի հետ, Անդրանիկ Մարտիրոսյանից վրեժխնդիր լինելու նպատակով, վերադարձել էր Հայաստան: Վերջիններս ՀՀ քաղաքացի, 33-ամյա Ռոբերտ Խ.-ի հետ միասին, 27-ամյա Արման Հ.-ի և 22-ամյա Կարեն Ա.-ի ավտոմեքենաներով ու նրանց ուղեկցությամբ մեկնել էին Գավառ: Անդրանիկ Մարտիրոսյանին պատկանող շուկայում Իլյա Ղ.-ն, Ավեդիս Ս.-ն, Արթուր Ղ.-ն և Ռոբերտ Խ.-ն մահակներով ծեծի են ենթարկել Անդրանիկ Մարտիրոսյանին: Բացի այդ, Իլյա Ղ.-ն ապօրինաբար ձեռք բերած ատրճանակով դիտավորությամբ կրակել էր Անդրանիկի ձախ ոտքին, ինչից հետո նրանք դիմել էին փախուստի: Ա.Մարտիրոսյանը օգնության համար բուժհիմնարկներ չէր դիմել և ժամեր անց, անգիտակից վիճակում տեղափոխվել էր Օրթոպեդիայի և վնասվածքաբանության կենտրոն՝ «ձախ ազդրի հրազենային վնասվածք, ձախ ազդրի միջին երրորդական բեկորային կոտրվածք, տրավմատիկ 2-րդ և 3-րդ աստիճանի շոկ» ախտորոշմամբ, որտեղ էլ հունիսի 25-ին, ժամը 01.00-ին, գիտակցության չգալով մահացել էր: Մարտիրոսյաններն, ի դեպ, Գավառում տաքսի ծառայություն ունեն, շուկա, ռեստորան, գազալցակայան: Գավառի գազալցակայանների կեսը պատկանում է Պալի Անդոյի ընտանիքին, մյուս կեսը՝ Գավառի նախկին դատախազ Յուրիկ Մարտիրոսյանին: Ստացվում է՝ բիզնես+ամուր թիկունք՝ պաշտոնական ատյաններում և քրեական աշխարհում=ամենազորության: Եվ այս դեպքը կարծես թե այդ մտածելակերպը փոխելու փորձ է:
Հ.Գ. Այդուհանդերձ, շատ լավ կլինի, որ պաշտոններ զբաղեցնող մարդիկ առաջինն իրենք կարգի հրավիրեն իրենց հարազատներին և ազգականներին և ոչ թե հովանավորեն, կոծկեն, հետո էլ մտածեն, թե ինչպես անեն, որ իրենց պաշտոնեական աթոռը փրկեն: Եվ այս իմաստով Աղվան Հովսեփյանի նախաձեռնությունը ողջունելի է: Մնում է, որ դա ռեալ, օբյեկտիվ արդյունք ունենա և դաս լինի նաև այլ պաշտոնյաների համար: Բայց առայժմ սպասենք վարչապետի պատասխանին:
