Վրաստանի վարչապետ Գեորգի Գախարիան հայտարարել է, որ Վրաստանը մտել է կորոնավիրուսի լայնամասշտաբ ներքին տարածման փուլ։ Գախարիան նաև նշել է, որ այս ամենը ստիպում է իշխանություններին գնալ գործող սահմանափակումների խստացմանը։
Այս առնչությամբ Նինոծմինդայի և Ախալքալաքի պատգամավոր Հենզել Մկոյանը մեզ հետ զրույցում ասաց. «Կարող եմ ասել, որ Վրաստանի վարչապետը կորոնավիրուսի վարակի վտանգով պայմանավորված ամբողջ իրավիճակի պատասխանատվությունն ու ծանրությունը վերցրել է իր վրա և շատ լուրջ աշխատանք է կազմակերպում կորոնավիրուսի դեմ: Այդ աշխատանքը հստակ երևում է, որովհետև այսօր Վրաստանում ամենաքիչն է վարակվածերի թիվը: Ես օրերս Facebook-ի իմ էջում գրել և շնորհակալություն եմ հայտնել Վրաստանի վարչապետին, նրա աշխատակազմին: Մեր բժիշկները նույնպես շատ լուրջ են վերաբերվում իրավիճակին: Բժիշկներ ունենք, որ 15-20 օր տանը չեն եղել»:
Ինչ վերաբերում է հայաբնակ շրջաններին, Հենզել Մկոյանն ասաց, որ Ախալքալակն ու Նինոծմինդան այսօր Վրաստանում համարվում է կանաչ գոտի, քանի որ ոչ մի վարակված չունեն. «Միայն հիմա մի փոքր վախ կա՝ կապված նրա հետ, որ ապրիլի 19-ին վրացի ուղղափառների Զատիկն է: Հիմա կարևոր է, որ այդ օրը մարդիկ տանը մնան, չմասնակցեն եկեղեցական միջոցառումների, որովհետև այս ամբողջ աշխատանքը ջուրը կգնա, կկհամարվի չկատարված, եթե շատ մարդիկ գնան եկեղեցի»:
Մկոյանի խոսքով՝ երկրի վարչապետը, Թբիլիսիի քաղաքապետը կոչ են անում ժողովրդին այդ օրը չայցելել եկեղեցի, բայց այնպիսի հավատացյալներ կան, որ կարող է չենթարկվեն այդ կոչերին, անգամ հայտարարում են, որ եթե ուզում եք մեր ժողովրդի առողջությունը փրկեք, եթե ուզում եք եկեղեցին փրկել, տունը արեք արարողությունները, բայց ինչպես երևում է, կարող են լինել մարդիկ, որոնք 40 օր պաս են պահել, այդ օրը գնան եկեղեցի: Այդ վախը կա:
Հարցին, թե որքանով է հանրությունը պահում պետության կողմից սահմանված կանոնները, Հենզել Մկոյանը պատասխանեց. «Ես այդպիսի բան չէի պատկերացնում: Պատկերացնո՞ւմ եք, Վրաստանում ամբողջ ժողովուրդը գերմանացիների նման ճշտապահանջ են դարձել: Օրինակ, երեկոյան ժամը 9-ից հետո ոչ մի մեքենա, ոչ մի մարդ չես տեսնի դրսում: Երեկվանից էլ մեծ քաղաքները՝ Թբիլիսին, Ռուսթավին, Քութայիսին ու Բաթումին փակվեցին 10 օրով: Չես կարող ոչ քաղաքից դուրս գաս, ոչ քաղաք մտնես»: