Թուրքիայում կրկին դժգոհության ալիք է բարձրացել, երբ ռուսական «HTB» հեռուստաալիքով հեռարձակվող հաղորդումներից մեկի ժամանակ ցուցադրվել է Սևրի պայմանագրով նախատեսված Հայաստանի սահմանները, ինչպես նաև «Արևմտյան Հայաստանի վտարանդի կառավարություն» կազմակերպության կողմից օգտագործվող Արևմտյան Հայաստանի դրոշը:
Միջադեպին Թուրքիայում արձագանքել է հակահայկական հայտարարություններով հայտնի «ASIMDER» կազմակերպության («Հայկական անհիմն պնդումների դեմ պայքարի միություն») ղեկավար Գյոքսել Գյուլբեյը:
Նա Ռուսաստանին և Ֆրանսիային մեղադրել է Թուրքիայի հողերի վրա պետություն հիմնելու երազանք ունեցող հայերին բացահայտ աջակցություն ցուցաբերելու մեջ:
Իսկ Ռուսաստանին վերջինս մեղադրել է նաև դարեր շարունակ «թուրքերի արյունը թափելու և հայերի ձեռքով մուսուլմանների կոտորածներ իրականացնելու մեջ»:
Ավելի վաղ Թուրքիայում բարկության ալիք էր առաջացրել Չինաստանի կողմից Արարատ լեռը որպես Հայաստանի խորհրդանիշ հիշատակելու փաստը։
