Ադրբեջանի իշխանությունները, օգտվելով հակահամաճարակային սահմանափակումների ընձեռած հնարավորություններից, ձերբակալում են ընդդիիմադիր ակտիվիստներին՝ կառավարությանն ուղղված քննադատությունը կանխելու համար: Այս մասին հայտարարել է Human Rights Watch իրավապաշտպան կազմակերպությունը:
Այդ են վկայում վերջին շաբաթներին Ադրբեջանում կարանտինը խախտելու, ոստիկանությանը չենթարկվելու մեղադրանքներով մի խումբ ընդդիմադիր ակտիվիստների և լրագրողների 10-30 օրով ձերբակալության փաստերը: «Այդ ձերբակալություններն ամբողջովին համապատասխանում են Ադրբեջանում քաղաքական վրեժխնդրության վաղեմի մոդելին», – հայտարարել է իրավապաշտպան կառույցը՝ հորդորելով Ալիևի վարչակազմին անհապաղ դադարեցնել քաղաքականացված սահմանափակումները և ազատ արձակել ձերբակալվածներին:
Ըստ լրատվամիջոցի՝ նախօրեին ձերբակալվել է «Ժողովրդական ճակատ» ընդդիմադիր կուսակցության ևս մեկ ներկայացուցիչ՝ Նիյամեդին Ահմեդովը՝ «կարանտինային ռեժիմը խախտելու» մեղադրանքով: Քաղաքական ուժը հայտարարել է, որ մարտի 24-ից ի վեր կուսակցության 10 անդամ է ձերբակալվել: