ՀՀ Տարածքային կառավարման նախարարությունը կքննարկի Գավառի քաղաքապետ Գուրգեն Մարտիրոսյանի հետագա պաշտոնավարման նպատակահարմարության հարցը: Այս մասին այսօր լրագրողների հետ հանդիպման ժամանակ տեղեկացրեց ՏԿՆ փոխնախարար Վաչե Տերտերյանը:
«Նախարարությունն աշխատում է առաջարկության, գնահատականի, իրավական հետագա ընթացքի, օրենսդրությամբ սահմանված դեպքերին դրա համապատասպանության հարցը և այլն»,- ասաց Վ. Տերտերյանը:
Հիշեցնենք, որ գլխավոր դատախազ Աղվան Հովսեփյանը դիմել էր ՀՀ վարչապետին՝ առաջարկելով քննարկման առարկա դարձնել Գավառի քաղաքապետի հետագա պաշտոնավարման նպատակահարմարության հարցը՝ նկատի ունենալով ՀՀ հատուկ քննչական ծառայության վարույթում քննվող քրեական գործով հիմնավորված փաստական հանգամանքները:
Մասնավորապես՝ Հատուկ քննչական ծառայությունում քննվող քրեական գործով պարզվել է, որ Գ.Մարտիրոսյանը, տեղեկանալով իր ազգականներ՝ եղբայրներ Արամ և Արթուր Մարտիրոսյանների, ինչպես նաև Հրաչյա Պետրոսյանի կողմից Գավառ քաղաքի Ազատության փողոցում գտնվող «Պարտեզ» խանութի մոտակայքում նույն քաղաքի բնակիչներ Հակոբ և Հովսեփ Հովհաննիսյանների ու Սպարտակ Զարգարաղոյանի նկատմամբ սպանության փորձ կատարելու մասին, փորձել է օժանդակել նրանց փախուստին և իրավապահներից թաքցնելու նպատակով՝ դեպքից անմիջապես հետո նախապես չխոստացված էական օգնություն ցուցաբերել վերջիններիս: Նախաքննական մարմնի գնահատմամբ, Գուրգեն Մարտիրոսյանը կատարել է առանձնապես ծանր հանցագործության պարտակում՝ հանցանք կատարած անձանց, ինչպես նաև հանցագործության կատարման գործիքների՝ նախապես չխոստացված պարտակում և նրան մեղադրանք է առաջադրվել ՀՀ քրեական օրենսգրքի 334-րդ հոդվածի 1-ին մասով:
