ՀՀ ազգային ժողովի «Իմ քայլը» խմբակցության պատգամավոր Արսեն Ջուլֆալակյանն առաջարկում է հետաձգել այն մարզիկների զորակոչը, որոնք ամառը պետք է զորակոչվեն բանակ, սակայն կորոնավիրուսի համավարակի պատճառով չեն կարողանում օգտվել տարկետում ստանալու կամ սպորտային վաշտում ծառայելու հնարավորությունից։
Այս մասին Ջուլֆալակյանն ասաց ապրիլի 15-ի խորհրդարանի նիստում։
«Ինչպես գիտեք, ունենք Հայաստանում մի կարգավորում, ըստ որի, այն մարզիկները, որոնք Եվրոպայի կամ Աշխարհի առաջնություններում 1-5-րդ տեղեր են գրավում, բանակի ծառայությունից չորս տարով ստանում են տարկետում կամ ծառայությունն անցկացնում են սպորտային վաշտում։ Հիմա օբյեկտիվ պատճառներով ստեղծվել է մի իրավիճակ, որ այն մարզիկները, որոնք պատրատվում էին Եվրոպայի առաջնությանը, որը հիմնականում տեղի է ունենում մինչև ամառային զորակոչը, չունեն այդ հնարավորությունը և ամռանը գնալու են բանակ՝ չկարողանալով ապացուցել իրենց բարձր կարգը, որպեսզի օգտվեն տարկետումից, ժամկետի տեղափոխումից կամ սպորտային վաշտում ծառայելու հնարավորությունից»,- ասաց Ջուլֆալակյանը։
Պատգամավորը նշեց, որ ստեղծված իրավիճակում հնարավոր է, որ կորցնենք մեծ պոտենցիալով մարզիկների։
«Մարզական ֆեդերացիաներին առաջարկում եմ օլիմպիական մարզաձևերի, ինչպես նաև շախմատի և սամբոյի համար մինչև ամառային զորակոչն անցկացնել Հայաստանի պատանիների առաջնություն, որի արդյունքում յուրաքանչյուր մարզաձևից կձևավորվեն ազգային հավաքականներ։ Պաշտպանության նախարարությանն առաջարկում եմ ամառայինից ձմեռայինի տեղափոխել հավաքական ընդգրկված այն մարզիկների զորակոչը, որոնք կծրագրավորվեն ներկայացնելու Հայաստանը 2020 թ. չորրորդ եռամսյակում կայանալիք վարկանիշային մրցաշարարերին»,- ասաց Արսեն Ջուլֆալակյանը։
Նրանք, որոնք կկարողանան այդ ընթացքում ձեռք բերել անհրաժեշտ վարկանիշը, կստանան օրենքով սահմանված տարկետում կամ սպորտային վաշտում ծառայելու իրավունք։
Աշխարհում կորոնավիրուսի համավարակի տարածման հետևանքով հետաձգվել են մի շարք մարզաձևերի աշխարհի և Եվրոպայի առաջնությունները, 2020թ. Օլիմպիական խաղերը։