Հարյուր հազարավոր քրիստոնյաներ աշխարհով մեկ տոնում են Սուրբ Հարության տոնին, որն այս անգամ անցկացվում է աննախադեպ պայմաններում. եկեղեցիները դատարկ են, հավատացյալները` տներում փակված, պատարագները օնլայն են անցկացվում:
Հռոմի Պապը, որ տասնամյակներ շարունակ Ավագ ուրբաթ առաջնորդում էր Խաչելության երթը Կոլիզեումի պատերի մոտ, այս տարի արարողությունն անցկացրել է Վատիկանի Սուրբ Պետրոսի կիսադատարկ հրապարակում:
Աշխարհի տարբեր երկրներից եկած հազարավոր հավատացյալների փոխարեն այս անգամ կաթոլիկ եկեղեցու առաջնորդին ուղեկցում էր ընդամենը տասը մարդ, հինգը` իտալական Պադույա քաղաքի բանտից, որն ամենից շատն էր տուժել համաճարակից, և հինգ բուժաշխատողներ Վատիկանից:
Պանդեմիայի պայմաններում նման սահմանափակումներն օրինաչափություն են ու կիրառվում են աշխարհի գրեթե բոլոր երկրներում։ Տոտալիտար, ավտորիտար երկրները, որպես կանոն, դժվարությամբ են տրվում համընդհանուր խաղի կանոններին՝ մի կողմից, նույնիսկ այս հարցում ապացուցելով, որ հակադրության մեջ են համաշխարհային համատեքստի հետ, մյուս կողմից՝ հանուն գաղափարական կաղապարների, շատ հաճախ զոհաբերելով մարդուն, քաղաքացուն։ Օրինակ՝ Ռուսաստանի Դաշնության նախագահի մամուլի խոսնակ Դմիտրի Պեսկովը երեկ հայտարարել է, որ Ռուսաստանում մայիսի 9-ին կկայանան Հաղթանակի օրվան նվիրված զորահանդեսն ու միջոցառումները։ «Կասկած չպետք է լինի, որ Հաղթանակի օրվան նվիրված զորահանդեսն ու միջոցառումներն անպայման կկայանան»,- ասել է Պեսկովը։
Ռուսաստանում կորոնավիրուսով վարակվածների թիվը հասել է 11 հազար 917-ի։ Հիվանդությունից մահացել է 100-ից ավելի մարդ, Մոսկվայի քաղաքապետը շարունակ պնդում է, որ իրենք դեռ հեռու են համաճարակի պիկից ու այս ամենի համատեքստում Պեսկովի ինքնավստահությունը միայն տարակուսանք է առաջացնում։ Չնայած նման ինքնավստահությանը՝ Պուտինն արդեն ունի իր համար կարևոր օրակարգից հրաժարվելու նախադեպ․ նրա իշխանությունը հավերժացնող սահմանադրական հանրաքվեն, որը նշանակված էր ապրլի 22-ին, չեղարկվեց՝ հենց կորոնավիրուսի հետևանքով։
Հայաստանի իշխանությունը երեկ հայտարարեց արտակարգ դրությունը երկարացնելու որոշման մասին ու նաև կիրառեց սահմանափակումներ, որոնք արտառոց կթվային տակավին ամսիներ առաջ։
Փոխվարչապետ, պարետ Տիգրան Ավինյանը ֆեյսբուքյան իր էջում կոչ է արել այսօր Զատիկը նշել տանն ու դուրս չգալ փողոց, չմասնակցել եկեղեցական արարողությունների: Ինքնին հասկանալի է, որ Հայաստանում կորոնավիրուսի շրջանառությունը դուրս է եկել վերահսկողությունից ու ցանկացած ոչ խոհեմ քայլ կարող է համաճարակային թվացյալ կայունությունը վերածել նոր բռնկման՝ վտանգելով մեր քաղաքացիների առողջությունը, կոլապսի առաջ կանգնեցնելով առողջապահական համակարգը։
Քաղաքացիների սոցիալական պատասխանատվությունը կարևորվում է ոչ միայն այսօր, այլ նաև առաջիկա ամսվա ընթացքում, մանավանդ, որ մայիսը մեր օրացույցում հարուստ է տոնական օրերով։
«Առաջիկայում ապրիլի 24-ն է, մայիսի առաջին տասնօրյակում ունենք երկու տոն՝ Շուշիի ազատագրման օրը և Հայրենական պատերազմի օրը, այս միջոցառումները ևս պետք է սահմանափակվեն, որևէ միջոցառման քաղաքացիների մասնակցությունը պետք է սահմանափակվի: Այն պաշտոնյաները, որոնք ունեն արարողակարգային անելիք, կանցկացնեն, նույնը վերաբերում է մայիսի 8-ին և 9-ին, մայիս 1-ի հետ կապված էլ զանգվածային միջոցառումներ չեն լինի»,- երեկ ֆեյսբուքյան ուղիղ եթերում ասել է Նիկոլ Փաշինյանը։
Թվում է՝ նման հորդորները վկայում են երկրում ստեղծված փակուղային իրավիճակի մասին, սակայն նման արտառոց վիճակը, սահմանափակումներն անհրաժեշտություն են, որպեսզի լույսը թունելի վերջում հնարավորինս շուտ երևա։
Լուսանկարը՝ panorama.am-ի