Արտակարգ դրության հերթական շաբաթը մոտենում է ավարտին. ընդհանուր առմամբ՝ ապրիլի 10-ին կորոնավիրուսի հաստատված դեպքերի թիվը հասել է 937-ի, այսօր վարակվածության 16 նոր դեպք է գրանցվել: Վերջին տվյալներով՝ ապաքինվել է 149 հիվանդ, փաստացի այս պահին բուժվում է 777 անձ, մահվան դեպքերը 12-ն են, բացասական արդյունք է արձանագրվել 5144 թեստավորման դեպքում:
Թեմայի շուրջ «Առաջին լրատվական»-ի հետ քննարկմանը մասնակցեցին սոցիոլոգ Արտակ Սաղաթելյանը և կրթության փորձագետ Արեգ Թադևոսյանը:
Արտակ Սաղաթելյանի խոսքով՝ հնարավոր է ևս մեկ ամսով երկարաձգվի արտակարգ դրության ռեժիմը, և այդ դեպքում ցանկալի է լսել ոչ միայն առողջապահության նախարարի կարծիքը, այլ նաև տնտեսական բլոկի պատասխանատուների տեսակետները՝ կապված այս հարցի հետ:
Արեգ Թադևոսյանի դիտարկմամբ՝ պետությունը ժողովրդի հետ չպետք է խոսի թվերի լեզվով. «Ուզում ենք հստակ հասկանալ՝ ինչ զարգացումներ կարող են լինել, միգուցե մի քանի տարբերակներ կան: Եվ ուզում ենք հասկանալ, թե ինչ նկատի ունի առողջապահության նախարարը՝ ասելով, որ երկար ժամանակ՝ մեկ-երկու տարի չենք վերադառնա բնականոն կյանքին: Եթե այդքան ժամանակ շարունակվի այս վիճակը դա ողբերգություն կլինի»:
Առողջապահության նախարարի խոսքով՝ վիրուսի շրջանառությունը դուրս է եկել վերահսկողությունից: Արտակ սաղաթելյանն անդրադառնալով այս դիտարկմանը, նշեց, որ դա պետք է ընդունել ի գիտություն և այդ իրավիճակում մի քանի սցենար մշակել. «Անգամ քաոսային իրավիճակներում մարդիկ հաշվարկներ են անում, պլանավորում, փորձում լուծումներ գտնել, և այդ աշխատանքը միայն առողջապահության համակարգի ուսերին չպետք է թողնել»:
Հարցին, թե Հայաստանում եթե զանգվածային թեստեր արվեն, արդյոք կփոխվի պատկերը, Արեգ Թադևոսյանն արձագանքեց՝ կփոխվի. «Զանգվածային թեստավորումը կօգնի տեսնել իրական պատկերը, բայց չի օգնի վերահսկել իրավիճակը, քանի որ ամբողջ մոլորակում այս վարակի դեմ միակ պայքարողը դեռևս միայն մարդու օրգանիզմն է, իմունիտետը»:
Մանրամասն՝ տեսանյութում:
