Կորոնավիրուսի շրջանառությունը դուրս է եկել վերահսկողությունից: Նախկինում Հայաստանում օրական հայտնաբերվում էր կորոնավիրուսի 50 դեպք, բայց բոլորը՝ մի աղբյուրից, օրինակ՝ մեկ արտադրամասում։ Իսկ հիմա հայտնաբերվում է 16, 20, 30 դեպք, բայց 10-20 տարբեր աղբյուրներից։ Այս մասին Առողջապահության և սոցիալական հարցերի խորհրդարանական մշտական հանձնաժողովի նիստի ժամանակ հայտնեց առողջապահության նախարար Արսեն Թորոսյանը։ Նրա խոսքով՝ հիմա մենք չենք կարող համարել, որ կորոնավիրուսի տարածումը կանգնում է և 100 տոկոս մարում: Թեմայի շուրջ «Առաջին լրատվական»-ը զրուցել է ԵՊԲՀ ներքին հիվանդությունների, պրոպեդևտիկայի ամբիոնի վարիչ Զինաիդա Ջնտոյանի հետ:
«Համաձայն եմ առողջապահության նախարարի կարծիքի հետ, որ վիրուսի տարածումը դուրս է եկել վերահսկողությունից,- նշեց Զ. Ջնտոյանը՝ ընդգծելով, որ վարակի տարածումը կանխարգելելու համար շատ կարևոր նշանակություն ունի ժողովրդի գիտակցումը, որ պետք է սահմանափակել շփումները:
Հայաստանում արձանագրվել է կորոնավիրուսով վարակվելու 16 նոր դեպք, կորոնավիրուսի հաստատված դեպքերի ընդհանուր թիվը 937 է, արձանագրվել է մահվան 12 դեպք։ Անդրադառնալով վիճակագրական տվյալներին՝ Զ. Ջանտոյանը նշեց, որ այս վիճակագրությունով պայմանավորված՝ հնարավոր չէ ասել, որ հաղթահարել ենք կորոնավիրուսի պիկը. «Դեռ չենք հաղթահարել և չենք կարող կանխատեսել, թե երբ է լինելու պիկը: Չպետք է ոգևորվել թվերով, դեռ շատ հիվանդներ կարող են հայտանբերվել: Կորոնավիրուսի պիկը դեռ առջևում է»:
Մանրամասն՝ տեսանյութում: