«Առաջին լրատվական»-ի զրուցակիցն է ՀՀ արտակարգ և լիազոր դեսպան, Արցախի ԱԳ նախկին նախարար Արման Մելիքյանը:
– Պարոն Մելիքյան, ինչպե՞ս եք գնահատում Արցախում ստեղծված ներքաղաքական իրավիճակը։ Մասիս Մայիլյանը փաստորեն հրաժարվեց ընտրապայքարից։ Ի՞նչ զարգացումներ են հնարավոր առաջիկայում։
– Մարտի 31-ի արդյունքներն Արցախում 2018 թվականի հայաստանյան իշխանափոխության կրկնության դուռը բացեցին այնտեղ: Արցախյան իշխանական ու իշխանամերձ վերնախավերի պահվածքը թափանցիկ ու հասկանալի էր՝ նրանք անձնապես կորցնելու շատ բան ունեն, բայց իրենց վարքագիծը, վստահաբար, արդարացնում են ազգային շահը պաշտպանելու այն բարձր առաքելությամբ, որն իրենք իրենց են վերագրում: Այժմ Արցախում մարդիկ վերջնականապես գլխի են ընկել, որ այս մարդկանցից ազատվելու համար միակ արդյունավետ միջոցը զանգվածային ընդվզումն է: Բայց այդ ընդվզումն էլ նպատակին կհասնի միայն այն դեպքում, եթե խելքը գլխին, հարգված ու սկզբունքային մարդիկ առաջնորդեն այդ շարժումը:
– Ինչո՞վ եք պայմանավորում գեներալ Սամվել Բաբայանի հետ կանգնելը պայքարից։ Փաստորեն վերջինս Մասիս Մայիլյանին սատարելուց հրաժարվեց։ Կարելի՞ է ենթադրել, որ պատճառն այն է, որ իր կուսակցության համար խորհրդարանում արդեն տեղ է ապահովել։
– Որքան հասկանում եմ, նախ պարոն Մայիլյանն է կոչ արել իր կողմնակիցներին բոյկոտելու ընտրությունների երկրորդ փուլը: Եթե Մասիս Մայիլյանը չի վիճարկում առաջին փուլի արդյունքները և ճանաչում է ընտրությունների իրավաչափությունը, ապա արդեն իսկ պարտված է, և այդ համատեքստում Սամվել Բաբայանի պահվածքը միանգամայն խելամիտ է՝ նա իմաստ չի տեսնում իր պարտությունը կանխավ ճանաչած թեկնածուին սատարելով թուլացնել սեփական քաղաքական դիրքերը: Այդ պահվածքը ճիշտ կլիներ անգամ, եթե գեներալ Բաբայանի կուսակցությունը ԱՀ Ազգային ժողովում ոչ մի տեղ ստացած չլիներ:
– Վարչապետ Նիկոլ Փաշինյանի դիրքորոշումն ընտրությունների հարցում ի՞նչ է նշանակում՝ ըստ Ձեզ։ Ասում է՝ Արցախում հեղափոխություն չի եղել, բայց նաև հակահեղափոխություն չի եղել։ Արդյոք սա բավարա՞ր էր ընտրությունների արդյունքներին նման կերպ արձագանքելու համար։
– Միանգամայն ստույգ գնահատական է՝ արցախյան քաղաքական ճահիճն առայժմ պահեց իր դիրքերը: Արցախում հեղափոխություն տեղի չունեցավ՝ չձևավորվեց արցախահայության լիարժեք ու անվերապահ աջակցությունը վայելող այն հեղափոխական նոր իշխանությունը, որի քաղաքական մոտեցումների հետ պետք է ապագայում հաշվի նստեր վարչապետ Փաշինյանի կառավարությունը: Այնտեղ չհաղթեց նաև հակահեղափոխությունը՝ իշխանական վերնախավի այս ընտրական խաղերի արդյունքը նաև այն եղավ, որ ժամանակին Ստեփանակերտից Երևան եկած հայտնի դեմքերը երկրորդ գալստյան հնարավորությունից զրկվեցին վերջնականապես: Այժմ վարչապետ Փաշինյանն ինքն իրեն պետք է մի հարցի պատասխանի՝ արդյոք պատրա՞ստ է լինելու ոստիկանական ուժեր ուղարկել Արցախ, որպեսզի այնտեղ օգնի ուժով ճնշելու ժողովրդի հավանական ընդվզումը:
– Արդյոք միայն այն փաստը, որ Արայիկ Հարությունյանը չի կեղծել իրեն անհրաժեշտ մի քանի հարյուր ձայնը, թույլ տալի՞ս է մտածել, որ ընտրությունների արդյունքները չեն կեղծվել։
– Արդեն ասել եմ, որ անհրաժեշտ է ստուգել, թե ում օգտին են եղել անվավեր ճանաչված քվեաթերթիկները: Եթե դրանցում առավելապես նշված է եղել Արայիկ Հարությունյանի անունը, ապա կնշանակի, որ «ընտրական գործընթացի» խաղավարները, զգուշանալով հնարավոր զանգվածային դժգոհություններից, վերջին պահին որոշել են հրաժարվել առաջին փուլում հաղթելու մտքից և նախընտրել են գնալ երկրորդ փուլի: Այս որոշումն իրագործելու համար բավական էր պարոն Հարությունյանի անվամբ քվեաթերթիկների անհրաժեշտ քանակություն անվավեր դարձնելը՝ դրանցում լրացուցիչ գրառումներ կատարելու միջոցով:
