«Վերջին 2 օրերին լավ դինամիկա ենք նկատում գների նվազման, բայց դա դեռ չի նշանակում, որ գները հասել են փետրվար ամսվա գներին»,- այսօր՝ ապրիլի 10-ին, Կառավարության մամուլի կենտրոնում կայացած ասուլիսի ժամանակ ասաց Տնտեսական մրցակցության պաշտպանության պետական հանձնաժողովի նախագահ Գեղամ Գևորգյանը:
Նա տեղեկացրեց, որ հանձնաժողովի աշխատանքները 24 ժամ շարունակվում են, խումբը հերթափոխով ուսումնասիրություն է իրականացնում Երևանում և մարզերում: Խոշոր տնտեսվարողների մոտ առկա պաշարների մասով անհանգստացնող երևույթներ գոյություն չունեն, պարենային մթերքի քանակը բավարար է:
Արտակարգ պայմաններում տնտեսվարողների կողմից խախտումներ թույլ տալը, նրա խոսքով, կդիտվի որպես ծանրացնող հանգամանք:
Հանձնաժողովի ուսումնասիրության համաձայն՝ հնդկաձավարի գինը փետրվարին 705 դրամ է եղել, պիկը եղել է 730 դրամ՝ ապրիլին, իսկ այժմ 710 դրամ է` նվազում է եղել: Ցիտրուսային մրգերի, մասնավորապես նարինջի դեպքում կա գնի բարձրացում`60 դրամով բարձրացել է նարնջի գինը, բայց դարձյալ փետրվարի գներից հեռու է, ինչը պայմանավորված է բեռնափոխադրումներով: