Մասնագետները խորհուրդ են տալիս արտակարգ դրության ռեժիմի պայմաններում վերանայել սննդակարգը, քանի որ մարզասրահները փակ են, մարդիկ քիչ են շարժվում, շատ են քնում, անընդհատ սառնարանին են մոտենում և ըստ այդմ՝ գիրանալու նախապայմաններ կան: Ինչպես չգիրանալ կարանտինի օրերին, արդյոք ինքնամեկուսացումը պահանջում է հատուկ սննդակարգ, այս արդիական թեմայի շուրջ «Առաջին լրատվական»,-ը զրուցել է դիետոլոգ Լիդիա Այվազյանի հետ:
Դիետոլոգի դիտարկմամբ՝ ճարպակալումն ամբողջ աշխարհում հասել է ահռելի տեմպերի, և կորոնավիրուսը վտանգավոր է հատկապես գեր մարդկանց համար. «Կորոնավիրուսային վարակվածության դեպքում ճարպակալում ունեցող մարդկանց մոտ ընթացքը ծանր է լինում, ծանր դեպքերի 80 տոկոսի դեպքում հիվանդները գեր մարդիկ են: Ճարպակալում ունեցող մարդկանց սիրտը ծանրաբեռնված է աշխատում, ունեն աթերոսկլերոզ՝ նրանց անոթները վատ են արյուն մատակարում, և թթվածնի մատակարարումը էլ ավելի է դժվարանում կորոնավիրուսով վարակվելու դեպքում»:
Լիդիա Այվազյանի խոսքով՝ այս ընթացքում չի կարելի ամեն ինչ ուտել և չի կարելի հետաձգել նիհարելու պրոցեսը՝ մտածելով, որ այս սթրեսային իրավիճակից դուրս գալուց հետո միայն կարելի է սկսել ճիշտ սննդակարգով սնվել և նիհարել: «Իմուն համակարգը լավ է աշխատում, երբ որ սննդակարգը լինում է բազմազան և բալանսավորված»,- ընդգծեց մեր զրուցակիցը՝ հորդորելով անցնել առողջ սննդակարգի:
Մանրամասն՝ տեսանյութում: