Ռուսաստանում ապրող մեր հայրենակիցներից շատերն այսօր Հայաստան վերադառնալու խնդրի առաջ են կանգնած։ Ռուսաստանի հայերի միությունն այս ընթացքում ամենաակտիվը պետք է լիներ, այնինչ ամբողջ բեռը մնացել է մի քանի մեծահարուստների և դեսպանատան վրա։ Մինչդեռ այս կազմակերպությունը ներկայացված է ամբողջ Ռուսաստանի տարածքում, և միայն իրենք կարող էին մարդկանց հասնել տեղերում։
Կորոնավիրուսի հետևանքով առաջացած սոցիալական խնդիրները մեղմելու նպատակով Ռուսաստանի հայերի միությունը Հայաստանում ծրագիր է իրականացնում։ Այդ մասին «Առաջին լրատվական»-ի հետ զրույցում ասաց Ռուսաստանի հայերի միության փոխնախագահ Վլադիմիր Աղայանը։ 12.000 անապահով ընտանիքի այսօրվանից ՀՀ տարբեր մարզեր պարենային, ինչպես նաև առաջին անհրաժեշտության ծանրոցներ կուղարկվեն։ Ռուսաստանում նույնպես այդպիսի ծրագիր են իրականացնում «Արա Աբրահամյան» հիմնադրամի միջոցով։
«Согласие-Армения» ընկերության գլխավոր տնօրեն Գագիկ Ավետիսյանը «Առաջին լրատվական»-ի հետ զրույցում նշեց, որ համագործակցում են քաղաքապետարանի և մարզպետարանների հետ և այսօր արդեն քաղաքապետարանին՝ Երևան քաղաքի համար, 3000 հատ ծանրոց են հատկացրել, մարզերում, Գյումրի՝ 2000, Վանաձոր, Սպիտակ՝ 1500, Վայոց ձոր՝ 2500, Տավուշ՝ 1000, Սյունիք՝ 1000, Ղարաբաղ՝ 1000։ Մարզեր կառաքեն մյուս շաբաթ։ Ծանրոցի մեջ ներառված է ձեթ, շաքարավազ, ձու, սպագետի, մակարոն երեք տուփ, ալյուր, բրինձ, հաճար։
Մարզերում անապահով ընտանիքների ցուցակները մարզպետարաններում են կազմում։ Գագիկ Ավետիսյանը նշեց, որ այս օրերին իրենց բարեգործական ճաշարանը տարեցների համար նոր պայմաններ է ստեղծել. ոչ թե գալիս են իրենց ճաշը տանելու, այլ փաթեթավորված, նախատեսված մոտավորապես 170 տարեցի համար, ճաշերն առաքում են տուն։
Հետաքրքրվեցինք՝ որքան է կազմում Արա Աբրահամյանի օժանդակությունը։ Ծանրոցներից յուրաքանչյուրը մոտավորապես 4500 դրամ է կազմում, իսկ Արա Աբրահամյանը տրամադրել է 55-60 միլիոն դրամ։
Նրանց ունեցած տեղեկություններով՝ Ռուսաստանի հայերի միությունը նույնպես աջակցում է մեր քաղաքացիներին Հայաստան վերադառնալու հարցում։
