Ամերիկյան Նյու Յորք քաղաքից մի փաստաբան խոսել է այն մասին, թե ինչպես է նա COVID-19-ի պատճառով հայտնվել վերակենդանացման բաժանմունքում: Այդ մասին հայտնում է ABC News- ը:
Դեվիդ Լատը նկատել է, որ հիվանդության առաջին ախտանիշներն ի հայտ են եկել մարտի առաջին կեսին, երբ Նյու Յորքում հայտնաբերվել էր կորոնավիրուսով վարակման միայն 55 դեպք: Նա ստիպված է եղել 3 անգամ դիմել մասնագետների, որպեսզի իրեն հոսպիտալացնեն:
Շուտով փաստաբանի վիճակը վատացել է: «Արյան թթվածնի հագեցվածության մակարդակն ընկել է, և ինձ ասացին, որ անհրաժեշտ է ինտուբացիա և միացնել թոքերի օդափոխության արհեստական սարքին», – ասել է նա առողջանալուց հետո: «Դա սարսափեցրեց ինձ, քանի որ լսեցի, որ դրանից հետո ոչ բոլորն են ապաքինվում»:
Խողովակը շնչառական ուղիներ է մտցվում անզգայացման ներքո: «Հիշում եմ, որ մտածում էի. «Ես կարող եմ մեռնել», – հիշում է Լաթը քնելու վերջին րոպեները: – Երբեմն վերացական մտածում ես. «Երբ քո ժամանակը գալիս է, դե, ժամանակն է»: Բայց այդ պահին սեղանի վրա ես մտածեցի. «Ոչ, ես չեմ ուզում մեռնել»:
Լաթը վեց օր միացված է եղել օդափոխիչ սարքին և մեկ շաբաթ անց դուրս է գրվել հիվանդանոցից: Նրա խոսքով՝ հիվանդությունից հետո նա սկսեց ավելի շատ գնահատել կյանքը: «Այնքան բաներ կան, որ մենք սովորական ենք համարում», – ասում է փաստաբանը: – Երբ ես գտնվում էի ծանր վիճակում, ինձ շատ հուզեցին ամբողջ աշխարհի սերն ու աջակցությունը: Մարդիկ աղոթում էին ինձ համար, երգում էին ինձ համար, և ցանկանում էին ամենալավը: Դժվար պահին նրանք աջակցեցին ինձ և իմ ընտանիքին»:
Վերջին տվյալների համաձայն, ապրիլի 9-ին ԱՄՆ-ում հայտնաբերվել է նոր կորոնավիրուսային վարակով վարակվելու 435,8 հազար դեպք: