«Առաջին լրատվական»-ի զրուցակիցն է «Ազատամարտիկների դաշինքի» խորհրդի անդամ Ռազմիկ Պետրոսյանը։
– Պարոն Պետրոսյան, Դուք ընտրական շրջանում սատարում էիք Սամվել Բաբայանին։ Ինչպե՞ս եք գնահատում ընտրությունների արդյունքները, համաձայն որոնց՝ իր կուսակցությունը խորհրդարանում թվով երկրորդ ուժն է լինելու։
– Քանի որ տեղում չեմ եղել, հստակ ասել չեմ կարող՝ ինչքանով են արդյունքները համապատասխանում իրականությանը։ Բայց ընդհանուր առմամբ, ներքին ինֆորմացիաներով տեղեկացա, որ կատարվել է այն, ինչ միշտ է կատարվել՝ իշխանական ռեսուրսի կիրառում և այլն։ Պետք է այդպես էլ լիներ, դիտորդների քանակը սահմանափակ էր, ու կաշկանդող ոչինչ չկար։ Սամվել Բաբայանի երկրորդ տեղում հայտնվելը բոլորի համար անակնկալ էր, այդպես չպետք է լիներ։ Ճիշտ է, իրեն չթողեցին նախագահի թեկնածու լինել, բայց խորհրդարանում պետք է առաջին տեղը լիներ։
– Ձեր կարծիքով՝ Ս. Բաբայանը խորհրդարանում պետք է ընդդիմադիր դիրքերի՞ց հանդես գա, թե՞ համագործակցի Արայիկ Հարությունյանի ղեկավարած ուժի հետ։
– Ես չեմ կարող իրենց փոխարեն որոշում կայացնել։ Միայն մի բան կարող եմ ասել՝ կառուցողական ընդդիմությունը նույն համագործակցությունից ոչ պակաս կարևոր է երկրի զարգացման համար։ Առանց կառուցողական ընդդիմության ոչ մի տեսակի իշխանություն հաջողություն չի կարող ունենալ։ Եթե իշխանության հետ գնան, էլ ո՞վ խորհրդարանում ընդդիմադիր լինի։ Ինձ թվում է՝ խորհրդարանում պետք է հակակշռի կարգավիճակ լինի, միայն այդպես կարող ենք զարգացման խնդիր դնել։ Մանավանդ որ տվյալ դեպքում իրենց ծրագրերում կար տարբերություն, եթե համատեղ չեն գնացել, նշանակում է՝ տարբեր մոտեցումներ ունեն։ Իրար փոխլրացնելու, հակակշռելու հարց պետք է դրվի, ոչ թե սերտ համագործակցության։ Աստված տա՝ գտնեն այն մեխանիզմը, որը կնպաստի Արցախի զարգացմանը։ Մի բան կա, որ երկուսի մոտ էլ ընդհանուր է՝ երկուսն էլ ընդունում են, որ «Արցախը Հայաստան է, ու վերջ»։ Դա շատ կարևոր է, այդ մտածելակերպն ամենաճիշտն է, ոչ թե երկու պետության տարբերակը։ Որոշ մարդիկ դա դարձրել են դրոշակ ու փորձում են երկու պետությունների միջև սեպ խրել։ Թե՛ Արայիկը, թե՛ Սամվել Բաբայանը ընդունում են «Արցախը Հայաստան է, ու վերջ» կարգախոսը։ Բաբայան Սամոն դեռ 90-ականներին ասում էր, որ Արցախը Հայաստանի մարզ է, պետք է մարզպետ ունենա, ու վարչական ծախսերն էլ պետք է ուղղվեն տնտեսության զարգացման վրա։ Շատ ճիշտ էր ասում, ես էլ եմ կարծում, որ ընդհանուր պետություն ունենալը ամենաճիշտ տարբերակն է։
– Այսինքն՝ կարո՞ղ ենք արձանագրել, որ թշնամական վերաբերմունք չկա իրար նկատմամբ։
– Իհարկե ոչ։ Եթե թշնամանք ունենան իրար նկատմամբ՝ դա ավելի շատ Արցախին կվնասի, մեր երկրի կորուստը կլինի։
Կառուցողական ընդդիմության անհրաժեշտություն կա։ Վստահ եմ, որ լավ է լինելու։ Պարզապես իմ ակնկալիքն այն էր որ կարելի էր ավելի մաքուր ընտրություն անցկացնել, բայց եղածը եղած է։ Հույս ունենք, որ երկիրն այդ վիճակից դուրս կբերվի։
– Սամվել Բաբայանը քաղաքացիության ժամկետների պատճառով չկարողացավ առաջադրվել, բայց այլ պաշտոնների համար դա խնդիր չի լինի։ Կա՞ ցանկություն կամ նպատակ գործադիրում որևէ պաշտոն ունենալու։
– Ես տեղյակ չեմ՝ նպատակ կա, թե ոչ, բայց անձամբ շատ կցանկանայի, որ ընդգրկվեր պետական կառավարման համակարգում։ Տվյալ դեպքում՝ գործադիրում, որովհետև իր ընդունակությունները պետք է օգտագործվեն։
Հայրենիքին նվիրվածությունից բացի՝ կան նաև ի վերուստ տրված ունակություններ, որոք ի նպաստ երկրի պետք է օգտագործվեն։
