Շվեյցարիայի նախագահի հրավերով այս շաբաթվա վերջին Թուրքիայի ղեկավար Աբդուլա Գյուլը կմեկնի Բեռն, հաղորդում են թուրքական լրատվամիջոցները` ընդգծելով, որ այցը շատ կարևոր է երկկողմ հարաբերությունների զարգացման տեսանկյունից։ «Սա Թուրքիայի նախագահի` պատմության մեջ առաջին պետական այցն է Շվեյցարիա», – տեղեկացրել է Turkiye-ն և ընդգծել, որ ամեն տարի կոնֆեդերացիան պետական մակարդակով ընդամենը երկու երկրի նախագահի է հյուրընկալում։ «Այդ առումով Գյուլի այցը առանցքային է, քանի որ որոշումը, թե ում կհրավիրենք, ռազմավարական նշանակություն ունի մեզ համար», – թերթին ասել է Շվեյցարիայի նախագահ Դորիս Լյութարդը։
Լրատվամիջոցները փաստում են, որ այժմ երկու երկրների հարաբերությունները գերազանց վիճակում են, թեև մի քանի տարի առաջ` 2003թ., դրանք բավական լարվել էին խորհրդարանի ստորին պալատում Հայոց ցեղասպանության մասին բանաձևի ընդունումից հետո։ «Ի պատասխան` պաշտոնական Անկարան չեղյալ էր հայտարարել Շվեյցարիայի արտաքին գործերի նախարար Միշլին Քալմի-Ռեյի` նախապես ծրագրված այցը Թուրքիա», – հիշեցնում է Swissinfo գործակալությունը` ընդգծելով, որ այցը, այդուամենայնիվ, կայացել է 2005 թվականին, և դրանից ի վեր երկու երկրների հարաբերությունները բարելավվել են: Շվեյցարիան միջազգային մի շարք ուժերի աջակցությամբ միջնորդական ջանքեր է գործադրում հայ – թուրքական հարաբերությունների կարգավորման ուղղությամբ։ Անդրադառնալով այդ խնդրին` Շվեյցարիայի նախագահը մի քանի շաբաթ առաջ թուրքական Star թերթի հետ զրույցում նշել էր, որ Ցյուրիխում շուրջ մեկ տարի առաջ ստորագրված արձանագրությունները մնում են սեղանին, և այժմ կողմերի միջև շարունակվում է լուռ դիվանագիտության փուլը։ «Ժամանակ է պետք առաջընթաց արձանագրելու համար, սակայն հուսով եմ, որ այն տեղի կունենա, – ասել էր տիկին Լյութարդը և ընդգծել, – Երբեմն գործընթացի արագությունը չէ կարևոր, այլ որակը: Փոխըմբռնման և որակի հարցում Հայաստանը և Թուրքիան նույն տեսակետն ունեն»։