Ղազախստանի առաջին նախագահ Նուրսուլթան Նազարբաևի դուստրն ու թոռը հաղթել են Մեծ Բրիտանիայի հանցավորության ազգային գործակալության (NCA) կողմից «չհիմնավորված հարստության» մեղադրանքով իրենց առաջադրված դատը, հաղորդում է Financial Times-ը:
Թագավորության գերագույն դատարանը վճռել է, որ Դարիգա Նազարբաևան և Նուրալի Ալիևը անմեղ են: Նրանց մեղադրանք էր առաջադրվել 80 միլիոն ֆունտ (մոտ 100 միլիոն դոլար) ընդհանուր արժողությամբ անշարժ գույքի սեփականության համար, որը նրանք ձեռք էին բերել անազնիվ վաստակած միջոցներով: Նշվում է, որ NCA-ն մտադիր է բողոքարկել դատարանի որոշումը:
Դատավորը շեշտել է, որ Նազարբաևները «բավականաչափ հարուստ են գույքի դիմաց վճարելու համար»: Հաստատվել է, որ վերջին տարիներին նրանք գրեթե ոչ մի կապ չեն ունեցել Նազարբաևի նախկին փեսայի՝ 2015-ին մահացած Ռահաթ Ալիևի հետ: Ըստ NCA-ի քննիչների, անշարժ գույքը կարող էր ձեռք բերվել նրա հանցավոր գործունեության արդյունքում:
Մարտի 11-ին Բրիտանիան կալանք էր դրել Նազարբաևների անշարժ գույքի վրա՝ «չհիմնավորված հարստության» կասկածանքով: Հայտնի էր դարձել նաև, որ գույքը (առանձնատուն` լողավազանով և կինոթատրոնով Բիշոփս-ավենյուում, տուն՝ Հայգեյթ շրջանում և բնակարան՝ Չելսիում) ձևակերպված է եղել երեք օֆշորներում՝ Անտիլյան կղզիներում, Պանամայում և բրիտանական Անգիլայում: