Ռուսաստանի Դաշնությունում ելակի գները նվազել են, Հայաստանից ելակ արտահանողները վնասներ են կրում։ Այս մասին «Առաջին լրատվական»-ի հետ զրույցում ասաց ՀՀ-ում ելակի արտադրությամբ զբաղվող խոշոր ընկերություններից մեկի՝ «Գրինֆուդ»-ի փոխտնօրեն Գրիգոր Վարդանյանը։
Չնայած դրան, ընկերության փոխտնօրենի խոսքով, իրենք այս ընթացքում արտահանման խնդիր չեն ունեցել։ «Արտահանման խնդիր չենք ունեցել, միայն լոգիստիկ պրոբլեմներ են եղել Վրաստանում, Լարսում՝ մոտ 10 օր առաջ, բայց հիմա խնդիր չունենք։
Գների հետ կապված խնդիր կա։ Ռուսաստանում ելակի գներն իջել են, բայց ելակը վաճառվում է»,- ասաց Գրիգոր Վարդանյանը։
«Գրինֆուդ» ընկերության փոխտնօրենի խոսքով՝ իրենք ՀՀ-ում այս պահի դրությամբ ելակ արտադրող ամենամեծ ընկերությունն են։ Չնայած արտահանման հիմնական շուկան Ռուսաստանն է, ընկերությունը փորձում է արաբական երկրներ ևս արտահանում իրականացնել։ «Կորոնավիրուսային ճգնաժամից առաջ փորձ ենք արել արտահանել Կատար ու Էմիրություններ։ Բայց այս համաճարակը սկսվելուց հետո այդ բոլոր ուղղությունները փակվեցին։ Հիմա միայն ՌԴ ենք արտահանում»,- մանրամասնեց մեր զրուցակիցը։
Նրա խոսքով՝ բեռնափոխադրման հետ կապված այս ընթացքում խնդիրներ եղել են, սակայն դրանք պետական մակարդակով չեն եղել, պարզապես Լարսի մաքսակետում առաջացած կուտակումների արդյունքում մեքենաները որոշ ժամանակ կանգնել են։
«Բայց, վերջիվերջո, այդ բեռները տեղ հասել են։ Մենք ոչ ոքի չենք կարող մեղադրել, թե ինչու են այդ կուտակումները եղել։ Համաճարակ էր»,- հավելեց նա։
Ի դեպ, երեկ վարչապետ Նիկոլ Փաշինյանը ֆեյսբուքում տեսանյութի միջոցով տեղեկացրեց, որ բանակում զինվորներին արդեն ելակ է տրամադրվում։ Այդ ելակը բանակին մատակարարել է հենց «Գրինֆուդ» ընկերությունը։ Գրիգոր Վարդանյանը նշեց, որ շուկայում առաջարկը եղել է, ցանկություն է եղել զինվորներին միրգ տալ, ու որոշել են հենց ելակից սկսել։ Բանակին մատակարարվել է լավագույն ելակը՝ ավելացրեց ընկերության փոխտնօրենը։
