Վարչպետ Նիկոլ Փաշինյանը ապրիլի 6-ին ուղիղ եթերում գրեթե 4 ժամ պատասխանեց քաղաքացիների՝ տարբեր ոլորտներ ընդգրկող հարցերին: Թեմայի շուրջ «Առաջին լրատվական»-ի հետ զրույցում քաղաքական վերլուծաբան Բորիս Նավասարդյանը նշեց, որ վարչապետն օգտվում է այն հնարավորությունից, որ իր նկատմամբ քաղաքացիների վստահության չափը բավականին մեծ է. «Եվ շարունակում է, այսպես ասած, հոգեթերապևտի դեր խաղալ՝ լայվերի միջոցով պարբերաբար երկարատև շփումներ ունենալով հանրության հետ: Կարծում եմ՝ նա հասկանում է, որ իր ասածները միանշանակ չեն ընդունվում բոլորի կողմից, բայց հանրության մեծամասնության համար ասվում էր այն, ինչ ուզում էին լսել մարդիկ, և դա հանգստացնող դեր էր խաղում, մանավանդ որ հանդիպումը համընկավ համավարակի դրական դինամիկայի հետ»:
Բորիս Նավասարդյանի կարծիքով՝ օնլայն հարցուպատասխանով վարչապետը լուծեց քաղաքական կոնկրետ խնդիր: «Նկատեցի հատկանշական մի ուղերձ՝ շատ բաներ մի՛ սպասեք մեզանից, մեծ կադրային փոփոխություններ չեն լինելու, քաղաքականության մեջ կտրուկ փոփոխություններ չեն լինելու, ավելի արագ զարգացումներ մի՛սպասեք: Դա շատերին կարող է դուր չգալ, բայց ստեղծում է իրատեսական պատկեր, թե ինչ է կատարվում մեր երկրում… Հասարակության մեջ կա փոքրամասնություն, որը սպասում է մեր կյանքում էական փոփոխությունների, և վարչապետն ակնարկեց՝ հանգիստ նստե՛ք տեղներդ, ձեր սպասելիքները չեն իրականանալու կամ դանդաղ են իրականանալու»,- նշեց մեր զրուցակիցը:
Քաղաքագետի դիտարկմամբ՝ այս օրերին ոչ միայն կտրուկ կարգավորումներ են իրականացվում համավարակի հետ կապված, այլ նաև ընդունվում են օրենքներ, որոնք բացարձակապես կապ չունեն այս իրավիճակի հետ. «Այս օրերին տեղի է ունենում իշխանական ռեսուրսների կոնսոլիդացիա»:
Մանրամասն՝ տեսանյութում: