Նավթի համաշխարհային գների նվազման ֆոնին էական գնանկում կա նաև Հայաստանում վառելիքի գների մասով։ Մասնավորապես, էական նվազել են բենզինի գները։ Այս օրերին բենզինի 1 լիտրն արժե 300-320 դրամ։
Որքան էլ ուշագրավ է, սակայն, դիզելի գինը շատ դանդաղ է նվազում, այս օրերին այն դեռևս վաճառվում է 370-390 դրամով։
ԱԺ պատգամավոր, տնտեսագետ Հայկ Գևորգյանի խոսքերով՝ այնպես չէ, որ չի նվազել։ Նախորդ ամիսներին 430-450 դրամով էր վաճառվում դիզելը։ Այսինքն՝ մոտ 15-18 տոկոսի գնանկում է եղել. «Կարծում եմ՝ ամեն դեպքում այդտեղ տնտեսական մրցակցության պաշտպանության պետական հանձնաժողովի ուսումնասիրության խնդիր կա։ Իրենք պետք է ուսումնասիրեն գնագոյացման սխեման։ Մենք դիզվառելիք արտադրող երկիր չենք, մենք ներկրող երկիր ենք և պետք է նայենք, թե այդ ներկրման երկրում դիզվառելիքի ինչ փոփոխություններ են եղել։ Անցած տարիներին էլ են բազմաթիվ նման դեպքեր եղել, երբ ամբողջ աշխարհում բենզինի գինը նվազել է, բայց դիզվառելիքի գինը կամ համարժեք չի նվազել, կամ ընդհանրապես չի նվազել։ Նույնիսկ դեպքեր են եղել, երբ բենզինի գների նվազման ֆոնին դիզվառելիքի գները բարձրացել են։ Այնուամենայնիվ, կրկնում եմ, շղթան պետք է ուսումնասիրել և տեսնել՝ գնի նազում ներկրվող երկրում կա՞, թե՞ ոչ, և այդ նվազումը ինչպես է արտացոլվել մեզ մոտ դիզվառելիքի գնի վրա։ Դա կոնկրետ խնդիր է, և կոնկրետ ուսումնասիրության առարկա է»,- ասաց Գևորգյանը։
Նշենք, որ Հայաստանն ամենից շատ նավթամթերք ներմուծում է Ռուսաստանի Դաշնությունից։ ՌԴ-ից հետո նավթամթերք ներմուծում ենք Իրանի Իսլամական Հանրապետությունից։ Իրանից ներկրված նավթամթերքի ծավալում գերակշռում է հենց դիզվառելիքը։
«Ֆլեշ» ընկերության սեփականատեր Բարսեղ Բեգլարյանն «Առաջին լրատվական»-ի հետ զրույցում ասաց, որ շատ շուտով, մինչև շաբաթվա վերջ, ամենայն հավանականությամբ, դիզելի գները ևս կիջնեն։ «Հիմա շատ քիչ է նվազել, քանի որ մեծ խմբաքանակ էինք ներկրել մինչև գնանկումը։ Առաջիկայում, ամենայն հավանականությամբ, մինչև շաբաթվա վերջ գները կիջնեն, քանի որ նոր խմբաքանակ ենք ստացել»,- ասաց Բարսեղ Բեգլարյանը։
Մեր դիտարկմանը՝ մոտավորապես ինչ չափով կլինի նվազումը, արդյոք էական գնանկում կլինի, Բեգլարյանը պատասխանեց՝ չգիտեմ ու անջատեց հեռախոսը։
