Արցախի առողջապահության նախարարությունից փոխանցում են, որ նախորդ օրը ՀՀ ուղարկված երկու փորձանմուշների հետազոտության արդյունքներն այսօր ստացվել են. մեկը՝ դրական, մյուսը՝ բացասական:
Հաստատված դեպքով հիվանդն ապրիլի 2-ի առավոտյան շտապօգնության մեքենայով տեղափոխվել էր Քաշաթաղի բուժմիավորում և մեկուսացվել, որովհետև Արցախ էր վերադարձել ՀՀ-ից՝ «վարակի օջախ» համարվող բնակավայրից:
Երկրորդ քաղաքացին, որը թեստավորվել է, եղել է ՀՀ-ից վերադարձող քաղաքացու հարևանուհին, որը ապրիլի 4-ին այլ խնդրով տեղափոխված է եղել նույն բուժմիավորում՝ բրոնխիտի ախտանիշներով:
«Հաշվի առնելով այն հանգամանքը, որ քաղաքացին ՀՀ-ից Արցախ վերադառնալուց հետո գտնվել է Քաշաթաղի շրջանի Միրիկ գյուղում, ապա նախորդ օրերին նրա հետ առնչված բոլոր քաղաքացիները ապահովության նկատառումներով նախօրոք ինքնամեկուսացել են՝ 17 քաղաքացի: Այդ քաղաքացիներն այս պահին որևէ ախտանիշներ չունեն»,- նշված է հայտարարության մեջ։
Բնակավայրը շրջկենտրոնից գտնվում է 39, մայրաքաղաքից՝ 89 կմ հեռավորության վրա:
Արդյոք կորոնավիրուսի հաստատված դեպքն Արցախում հիմք կլինի՞ հետաձգելու ապրիլի 14-ին նախատեսվող ընտրությունների երկրորդ փուլը։ Արցախի Սահմանադրությունը նախատեսում է արտակարգ դրության և արտակարգ իրավիճակի ռեժիմներ, որոնք իրարից տարբեր կարգավորումներ են ենթադրում։
«Առաջին լրատվական»-ի հետ զրույցում Արցախի արդարադատության նախարար Արարատ Դանիելյանն ասաց. «Մեխանիզմը հետևյալն է՝ նախագահը պետք է ստորագրի արտակարգ դրություն հայտարարելու հրամանագիր։ Խորհրդարանն իրավունքի ուժով հրավիրում է արտահերթ նիստ, որով հաստատվում կամ չի հաստատվում արտակարգ դրություն հայտարարելը»։
Արդյոք արտակարգ դրություն հայտարարելու համար համաճարակը կարո՞ղ է հիմք լինել, նախարարն ասաց. «Համաճարակի համար կա արտակարգ իրավիճակ, որը ընտրությունների հետաձգում չի ենթադրում։ Իսկ ահա արտակարգ դրության իրավական ռեժիմի մասին օրենքով նշվում է, որ սահմանադրական կարգին վտանգ է սպառնում՝ զինված բախումներ և այլն։ Ի տարբերություն արտակարգ իրավիճակի, արտակարգ դրության ժամանակ քաղաքական պրոցեսներ՝ ընտրություններ չեն անցկացվում»։
Նախարարը նաև հավելեց, որ այժմ Արցախում շարժը քիչ է, մարդիկ տներում նստած են։
Նախագահի թեկնածու Արայիկ Հարությունյանի մամլո խոսնակ Վահրամ Պողոսյանն «Առաջին լրատվական»-ի հարցին ի պատասխան՝ ի՞նչ դիրքորոշում ունեն ընտրությունների հետաձգման վերաբերյալ, ասաց. «Մենք առաջնորդվելու ենք իշխանության կայացրած որոշումներով։ Մարդու առողջությունը մեզ համար գերագույն պայման է»։
Հիշեցնենք, որ նախագահական ընտրությունների երկրորդ փուլում մրցելու են նախկին վարչապետ Արայիկ Հարությունյանը և ԱԳ նախարար Մասիս Մայիլյանը։ Վերջինս իր ընտրողներին, իր իսկ ձևակերպմամբ, համաճարակի վտանգներից ելնելով կոչ է արել բոյկոտել ընտրությունները։