Ռոբերտ Քոչարյանը կրկին դատի է տվել ՀՀ վարչապետ Նիկոլ Փաշինյանին: Այս մասին փոխանցում է Armtimes.com-ը՝ հղում անելով Դատական տեղեկատվական համակարգի տվյալներին:
Քոչարյանն այսպիսով հայցադիմում է ներկայացրել դատարան՝ հրապարակայնորեն արտահայտված զրպարտությունից պատիվը և արժանապատվությունը պաշտպանելու պահանջի մասին:
Հայցը ներկայացվել է ապրիլի 3-ին և մակագրվել Երևան քաղաքի ընդհանուր իրավասության դատարանի դատավոր Տիգրան Գրիգորյանին։
Ռոբերտ Քոչարյանի ներկայացուցիչ Հայկ Ալումյանը ՀԺ-ի հետ զրույցում ասաց, որ դատարանից նաև 2 միլիոն դրամ փոխհատուցում են պահանջում:
Ալումյանն ասաց, որ հայցի պատճառը չհավասարակշռված և անմեղության կանխավարկածը խախտող հայտարարություններն են, որոնք, ըստ նրա, արել է վարչապետը։
Հիշեցնենք, որ Ռոբերտ Քոչարյանը երկրորդ անգամ է դատի տալիս Նիկոլ Փաշինյանին. Երևան քաղաքի դատարանի դատավոր Լիլիթ Սարգսյանի որոշմամբ՝ գործի վարույթը կարճվել էր՝ հայցվորի կողմից հայցից հրաժարվելու հիմքով։
Մանրամասները՝ սկզբնաղբյուրում։