Վարչապետ Նիկոլ Փաշինյանը նախօրեին ֆեյսբուքյան ուղիղ եթերում պատասխանելով քաղաքացիների հարցերին՝ ասել է, որ երբ Յուրի Խաչատուրովն ու Սերժ Սարգսյանը ընդունեն ապրիլյան քննիչ հանձնաժողոի հրավերը, դա կլինի արդեն գործընթացի կուլմինացիան:
Հանձնաժողովը, որը գործում է արդեն գրեթե մեկ տարի և մինչև հունիս պետք է ներկայացնի իր եզրակացությունը, հրավեր էր ուղղել երկու գործիչներին էլ: Նախօրեին Սերժ Սարգսյանի գրասենյակը հայտնել էր, որ Սարգսյանը ստացել է հրավերը, ու որոշման մասին կտեղեկացնեն հանրությանը: Յուրի Խաչատուրովը, ինչպես հայտնի է, հրաժարվել է ներկայանալ հանձնաժողովին: Այդուհանդերձ, եթե հրավերն ընդունի Սերժ Սարգսյանը, դա արդեն կլինի կուլմինացիա, անգամ առանց Խաչատուրովի: Առավել ևս, որ խոշոր հաշվով իհարկե ապրիլյան քառօրյա պատերազմի առումով առանցքային շերտերը թերևս քաղաքական հարթության վրա են, ոչ թե ռազմական: Թեև Յուրի Խաչատուրովը լինելով ռազմական գործիչ, լինելով այդ ժամանակ ԶՈՒ գլխավոր շտաբի պետ՝ այդուհանդերձ նաև քաղաքական իրողություններ պայմանավորող և արտացոլող ֆիգուր էր:
Այդուհանդերձ, ինչ կուլմինացիայի մասին է խոսում վարչապետը: Նա ինքը հայտարարել է, որ ծանոթացել է ապրիլյան քառօրյա պատերազմի վերաբերյալ հարյուրավոր գաղտնի էջերի: Ի՞նչ հարցեր են մնացել Նիկոլ Փաշինյանի համար դրանց ծանոթանալուց հետո, և արդյո՞ք քննիչ հանձնաժողովը այդ իմաստով պետք է փնտրեր պատասխանները, որոնք թույլ էին տալու ամբողջացնել այն, թե ինչ է տեղի ունեցել 2016-ի ապրիլին՝ ռազմաքաղաքական իմաստով: Թե՞ հարյուրավոր էջերը Նիկոլ Փաշինյանի համար չեն թողել անպատասխան հարցեր, իսկ քննիչ հանձնաժողովը խոշոր հաշվով ոչ թե հարցերի պատասխան գտնելու, այլ եղած պատասխանը ձևակերպելու միջոց է՝ խորհրդարանական մակարդակում ձևակերպելու միջոց: Եվ խոսքը քաղաքական պատասխանի մասին է, ինչի համար էլ թերևս ընտրվել է հենց այդ հարթակը, ոչ թե իրավապահ հարթությունը: Եվ դա թերևս լինելու է Հայաստանի քաղաքական պատասխանը այն ուժերին, որոնք կանգնած են եղել Բաքվի ադրբեջանական ագրեսիայի շրջանակում:
Յուրի Խաչատուրովը փաստորեն հրաժարվել է մասնակցել այդ պատասխանի ձևակերպմանը: Կմասնակցի՞ այդ քաղաքական պատասխանի ձևակերպմանը Սերժ Սարգսյանը:
