Կունենայինք համաճարակի ահավոր բռնկում և ազգային անվտանգության լուրջ սպառնալիք

«Սասնա ծռեր» համահայկական կուսակցության քարտուղարությունը ապրիլի 5-ին տարածել է հայտարարություն, որով կոչ է արել կորոնավիրուսի համաճարակի պայմաններում թեստ անել ԶՈՒ ամբողջ անձնակազմին՝ նախապատվությունը տալով առաջնագծի զինծառայողներին։

«Սասնա ծռեր» համահայկական կուսակցության քարտուղարության անդամ Վարուժան Ավետիսյանին հիշեցրինք, որ առաջինը «Սասնա ծռերը» կոչ արեց հետաձգել Սահմանադրական հանրաքվեն, որպեսզի դեռ նոր-նոր աշխարհում տարածվող կորոնավիրուսը Հայաստանում էլ չտարածվի։ Իշխանություններն այն ժամանակ սկսեցին ակտիվ քարոզչություն իրականացնել մարզերում և Երևանում, և միայն որոշ ժամանակ անց, երբ ի հայտ եկան առաջին վարակվածները, դադարեցրին քարոզչությունը, հետաձգեցին հանրաքվեն և ձեռնարկեցին կոնկրետ միջոցառումներ։

Եթե կայանար Սահմանադրական հանրաքվեն ապրիլի 5-ին, ի՞նչ արդյունք կարձանագրեինք։

«Կունենայինք համաճարակի ահավոր բռնկում և ազգային անվտանգության լուրջ սպառնալիք»,- արձագանքեց Վարուժան Ավետիսյանը։ Նա նշեց, որ մենք կարիք ունենք ժողովրդի քվեով ընտրված նոր Սահմանադրություն մշակելու և ընդունելու։

«Այս Սահմանադրությունը մեր ժողովրդի կամքի բռնադատմամբ վզին փաթաթված փաստաթուղթ է, որը չունի իրավական ուժ։ Եվ դրա մեջ տեխնիկական, մասնակի փոփոխություններ կատարելու համար ողջ ժողովրդին ոտքի հանելն ու վտանգի ենթարկելը մենք համարում էինք անխոհեմություն և անպատասխանատվություն։ Փառք Աստծո, որ դա տեղի չունեցավ։ Իսկ Ազգային ժողովն ունի լիազորություններ և կարող է ՍԴ-ի դատավորների հարցը լուծել։ Իրենք (նկատի ունի իշխանություններին) են մտել ապազգային կեղեքիչ համակարգի տրամաբանության մեջ, իրենք են որդեգրել իրավահաջորդություն, թող իրենք էլ այդ բեռի տակից դուրս գան»,- նշեց Վարուժան Ավետիսյանը։

Ինչպիսի՞ն է լինելու հետկորոնավիրուսային Հայաստանը, տնտեսագետները կանխատեսում են, որ տնտեսական ճգնաժամ կլինի, բարդությունները հետո են սպասվում։
«Սասնա ծռեր» կուսակցությունն ի՞նչ այլընտրանքային ծրագրեր է կազմում, պատրաստվում ներկայացնել իշխանություններին, որպեսզի հաղթահարվի սպասվող ճգնաժամը։

«Մենք մտորում ենք, ինչպես մյուսները, փորձում ենք ծրագրեր, նախագծեր կազմել, ներկայացնել։ Անշուշտ, վիրտուալ աշխատանքը որոշակի բարդություններ է ստեղծում մասնագետների հետ քննարկումներ կազմակերպելու առումով և այլն։ Պետք է հասկանանք, որ աշխարհը փոխվելու է, և մենք էլ պետք է գնանք փոփոխությունների ալիքի հետևից։ Ըստ այդմ՝ պետք է դիրքավորվենք ապագայում, հասկանանք, թե ինչպես ենք տեսնում ապագան»,- նշեց մեր զրուցակիցը։