Բրիտանական հետախուզությունը կրկին քննարկում է այն վարկածը, որ կորոնավիրուսը տարածվել է Ուհան քաղաքի լաբորատորիաներից: Այս մասին հաղորդում է Daily Mail-ը:
Cobra արտակարգ իրավիճակների հանձնաժողովի անդամներից մեկի խոսքով, հետախուզական գործակալությունները չեն բացառում այս, ինչպես նաեւ կենդանուց վարակվելու տարբերակը:
«Վիրուսի բնույթի հիման վրա կա հուսալի այլընտրանք: Ուհանում նման լաբորատորիայի առկայությունը գուցե պատահական չէ: Այս վարկածը չի վերանում», – ասել է աղբյուրը:
Ուհանում կորոնավիրուսի բռնկման սկզբից ԶԼՄ-ներում եւ կայքերում բազմիցս են հրապարակումներ եղել կորոնավիրուսի առաջացման մասին:
Նման վարկածներից մեկն էլ այն մասին էր, որ վիրուսն արհեստականորեն է առաջացել Ուհանի վիրուսաբանության ինստիտուտում, որտեղ ուսումնասիրվում էին վիրուսակիր չղջիկների իմունային համակարգը: Այնտեղից էլ, ենթադրաբար, այն դուրս է եկել: Սակայն միկրոօրգանիզմների էկոլոգիայի գիտա-հետազոտական լաբորատորիայի ղեկավար Միխայիլ Շելկանովը ՌԻԱ Նովոստիին ասել է, որ «նոր կորոնավիրուսի արհեստական ծագումը կեղծ լուր է:
Այս մեղադրանքների վերաբերյալ Չինաստանի Գիտությունների ակադեմիայի Ուհանի վիրուսաբանության ինստիտուտը բաց նամակ է տարածել՝ դրանք անվանելով կեղծ և շեշտելով, որ ինստիտուտի աշխատակիցների խիղճը մաքուր է:
Չինաստանի ԱԳՆ պաշտոնական ներկայացուցիչ Գեն Շուանգն ասել է, որ միջազգային հանրությունը պետք է պայքարի ոչ միայն COVID-2019 տարածման դեմ, այլև դրա շուրջ ամեն տեսակի դավադիր տեսությունների և «քաղաքական վիրուսների» դեմ: Նա շեշտել է, որ «վիրուսի արտահոսքի» կամ «կենսաբանական զենք ստեղծելու» մասին պնդումները ոչ մի գիտական հիմք չունեն:
Ընդհանուր առմամբ, Առողջապահության համաշխարհային կազմակերպության տվյալներով ՝ վարակվել է մոտ 1,15 միլիոն մարդ, մահացել է գրեթե 63 հազար հիվանդ:
