Իմ հեռախոսին կլիոմետրերով հաղորդագրություններ են գալիս, որտեղ մեր քաղաքացիները ահազանգում են սոցիալական իրավիճակի մասին: Այս մասին «Առաջին լրատվական»-ի հետ զրույցում նշեց ԱԺ ԲՀԿ խմբակցության պատգամավոր Նաիրա Զոհրաբյանը:
Նա ընթերցեց նման հաղորդագրություններից մի քանիսը. «Բարև ձեզ տիկին Զոհրաբյան, ես սոված եմ: Եթե ևս երեք օր ես իմ երեխաներին չկարողանամ կերակրել, ես մեր համայնքի խանութից գողություն եմ անելու», «Տիկին Զոհրաբյան, ես որտեղից կարող եմ ստանալ սնունդ, օգնեք գոնե սնունդով, ես տնից դուրս չեմ գալիս»: Խոսքն օրական մի քանի հազար նամակի մասին է: Ես հասկանում եմ, որ իրավիճակը բացառիկ չէ Հայաստանի համար, հասկանում եմ, որ ամբողջ մոլորակը վարակած պանդեմիա է, բայց գիտեք, յուրաքանչյուր երկիր անում է ճշգրիտ քայլեր այս պանդեմիան գոնե հնարավոր սահմանների մեջ կառավարելի դարձնելու համար: Այսինքն եթե մենք չկարողանանք կառավարել պանդեմիան, պանդեմիան է կառավարելու մեզ: Իսկ որ պահին համաճարակը կառավարեց մեզ, ապա իմացեք, այդ ժամանակ լինելու են և մահեր, և տնտեսության վերջնական փլուզում»,-հայտարարեց Նաիրա Զոհրաբյանը: