Ապրիլի 5-ի դրությամբ Հայաստանում հաստատվել է կորոնավիրուսային հիվանդության 52 նոր դեպք, կորոնավիրուսով վարակվածների ընդհանուր թիվը հասել է 822-ի: Հայաստանի գրեթե բոլոր մարզերում կորոնավիրուսի հաստատված դեպքեր կան։ Մարզերում, քաղաքներում, գյուղերում կատարվում են ախտահանման աշխատանքներ։ «Առաջին լրատվական»-ը Շիրակի մարզի Մարալիկ համայնքի մի խումբ բնակիչներից ահազանգ-բողոք ստացավ, որ քաղաքում ախտահանման աշխատանքներ չեն իրականացվում, չնայած, որ վիրուսի հաստատված դեպք կա, ինչպես նաև մեկուսացվածներ։
Ըստ մեզ ահազանգած քաղաքացիների, խոշորացված համայնքի ղեկավար Արտակ Գևորգյանը քաղաքում ու հարակից համայնքներում ախտահանման պատշաճ աշխատանքներ չի իրականացնում։ Մարդիկ ինքնամեկուսացված են, սակայն անհանգստություն կա։ Նրանք նշում են, որ համայնքի ղեկավարը ախտահանման բացարձակապես ոչ մի աշխատանք չի իրականացնում։ Համայնքի բնակիչները վրդովված են։ Հատկապես հաստատված դեպքից հետո, մարդիկ սպասում են ավելի ուժեղացված հսկողություն և քաղաքի ախտահանման ծավալների մեծացման։
Մենք կապ հաստատեցինք խոշորացված Անի համայնքի մեջ մտնող Սառնաղբյուր գյուղի ղեկավար Գևորգ Աճեմյանի հետ, պարզելու՝ իրենց համայնքում այս առումով ինչ իրավիճակ է։ Մեզ հետ զրույցում գյուղի վարչական ղեկավարը նշեց՝ մի քանի օր առաջ մեքենայով են ախտահանում կատարել, մնացած բոլոր դեպքերում իրենք իրենց միջոցներով են հասարակական ավելի մարդաշատ վայրերը ախտահանել։ Ադմինիստրատիվ ղեկավարի խոսքով՝ մարդիկ ինքնամեկուսցման պահանջը ամբողջությամբ չեն կատարում, տանից դուրս են գալիս։ «Մենք ամեն ինչ անում ենք, մարդկանց զգուշացնում ենք, զանգում ենք, տեղյակ ենք պահում, բայց մարդիկ կարծես լուրջ չեն վերաբերվում։ Միգուցե մտածում են, որ իրենց վիրուսը չի կպնելու։ Մի մասն էլ ասում է՝ կարևոր գործեր ունենք։ Բայց այդ կարևոր գործերը մենք էլ ունենք։ Մենք ավելի կարևոր գործեր ունենք։ Մենք չենք շփվում ոչ մեկի հետ, ինքնամեկուսացված ենք»,- նշեց Գևորգ Աճեմյանը, ապա հավելեց՝ վիրուսի տարածումը կանխելու միակ արդյունավետ միջոցը տանը մնալն է։
Խոշորացված Անի համայնքի մեջ մտնող Լանջիկ գյուղի վարչական ղեկավար Դավիթ Մինասյանը մեզ հետ զրույցում տեղեկացրեց՝ համայնքի ղեկավար Արտակ Գևորգյանի կողմից ախտահանման որևէ մեծ միջոցառում տեղի չի ունեցել, ամեն վարչական ղեկավար իր համայնքում իրականացնում է։
«Մենք մեր գյուղապետարանում ենք ախտահանում իրականացնում»,- ասաց վարչական շրջանի ղեկավարը։ Ի տարբերություն Սառնաղբյուր գյուղի, Լանջիկում մարդիկ պահպանում են ինքնամեկուսացման պահանջը և տանից դուրս չեն գալիս։ «Մարդիկ ինքնամեկուսացված են, խուճապի մատնված չեն։ Ժողովուրդն իրազեկված է, ալկոգելերով, ամեն ձևով գիտեն՝ ինչպես պահպանել կանոնները։ Ամեն մարդ մեկուսացված է իր տարածքի մեջ»,- տեղեկացրեց Դավիթ Մինասյանը։
Խոշորացված Անի համայնքի ղեկավար Արտակ Գևորգյանը «Առաջին լրատվական»-ի հետ զրույցում հերքեց այն տեղեկությունները, թե քաղաքում ախտահանում չի իրականացվում ու չի պահպանվում վիրուսի տարածումը բացառող պայմանները։ «Քաղաքում կատարվում են բոլոր կարգի ախտահանման գործողությունները։ Ոչ միայն քաղաքում, նաև այն գյուղերում, որտեղ հնարավոր շարժը շատ է։ Փողոցների քլորով լվացումներ են կատարվում։ Կատարվում են նաև բազմաբնակարան բնակելի շենքերի շքամուտքերի ախտահանման գործողություններ։ Ինչպես նաև հասարակական վայրերում, մարդաշատ տարածքներում ևս կատարվում են ախտահանման աշխատանքներ»,- ասաց Գևորգյանը։ Հարցին՝ այդ դեպքում, ինչու՞ են մարդիկ բողոքում թերի աշխատանքից, Գևորգյանն ասաց․ «Բնականաբար կան անձրևոտ օրեր ու այդ օրերին նման գործողություններ չեն կատարվում։ Դրանք չեն կարող արդյունավետություն ապահովել։ Մենք խնդրում ենք քաղաքացիներին, որպեսզի իրենք հնարավորինս քչացնեն շարժը, որովհետև նրանք փորձում են ակտիվորեն դուրս գալ, շփումներ ունենալ»։ Գևորգյանի խոսքով՝ մարդիկ կան, ովքեր չեն ենթարկվում ինքնամեկուսացման կոչերին, բայց դրանով հանդերձ իրավիճակը լավ է։