«Արտակարգ դրության և համավարակի տարածման հանգամանքով պայմանավորված՝ փոփոխություններ են եղել նաև Սահմանադրական բարեփոխումների մասնագիտական հանձնաժողովի աշխատանքներում»,-այս մասին «Առաջին լրատվական»-ի հետ զրույցում ասաց մասնագիտական հանձնաժողովի անդամ, իրավաբան-գիտնական Անահիտ Մանասյանը։
Հիշեցնենք, որ փետրվարի 12-ին ՀՀ վարչապետ Նիկոլ Փաշինյանը որոշում էր ստորագրել Սահմանադրական բարեփոխումների մասնագիտական հանձնաժողովի ստեղծման, հանձնաժողովի կազմի հաստատման վերաբերյալ: Վարչապետի որոշմամբ հաստատվել էր նաև Սահմանադրական բարեփոխումների մասնագիտական հանձնաժողովի աշխատակարգը: Հանձնաժողովի գործունեությունը սկսելուց հետո եռամսյա ժամկետում պետք է մշակվեր Սահմանադրական բարեփոխումների հայեցակարգը, ապահովվեր դրա հանրային քննարկումը և մինչև 2020 թվականի սեպտեմբերի 1-ը մշակվեր ու Հայաստանի Հանրապետության վարչապետի աշխատակազմ ներկայացվեր Հայաստանի Հանրապետության Սահմանադրության փոփոխությունների նախագիծը։
Անահիտ Մանասյանը մեզ հետ զրույցում ասաց, որ այս օրերին հանձնաժողովը շարունակում է իրականացնել իր գործունեությունը՝ պարզապես փոքր-ինչ փոփոխված ձևաչափով։ «Մասնավորապես, հանձնաժողովի նիստերը այս ընթացքում գումարվում են առցանց տարատեսակ հարթակների օգտագործման միջոցով։ Շարունակվում են նաև սահմանադրական բարեփոխումների ուղղությունների համատեքստում ընդգրկված տարբեր հարցերի առնչությամբ հետազոտությունները»,- ասաց նա։
Ինչ վերաբերում է սահմանադրական բարեփոխումների ժամանակացույցին, ապա, ըստ Մանասյանի, հավանաբար այդ առումով կլինի որոշակի փոփոխություն և ժամկետների երկարաձգում, ինչի առնչությամբ, ըստ հանձնաժողովի անդամի, կլինի նաև պաշտոնական հաղորդագրություն։ «Այս պահին վերջնական դիրքորոշում՝ նշված հարցի հետ կապված, պաշտոնապես ներկայացված չէ: Կարծում եմ՝ նման վերջնական դիրքորոշման ձևավորումից հետո այն պաշտոնապես կհրապարակվի»,- ասաց Մանասյանը։
Հանձնաժողովի մեկ այլ անդամ՝ ԱԺ «Իմ քայլը» խմբակցության պատգամավոր Վահագն Հովակիմյանն էլ «Առաջին լրատվական»-ի հետ զրույցում նույնպես ասաց, որ ներկայումս նիստերը առցանց են կատարվում։ Նրա խոսքով՝ մասնագիտական հանձնաժողովի անդամներով ի սկզբանե պայմանավորվել են, որ եթե սահմանված ժամկետում իրենք չավարտեն աշխատանքները, ապա ժամկետները կերկարացվեն։ «Ի սկզբանե մենք ունեցել ենք մեր մտքում, որ հնարավոր է ժամկետները լրացուցիչ երկարացնելու խնդիր առաջանա։ Առաջին նիստի ժամանակ դեռևս կորոնավիրուսը չկար, բայց մենք մեր մտքում ունեցել ենք ժամկետները հնարավոր երկարացնելու պահը։ Այսինքն՝ այսպես է. եթե մենք սահմանված ժամանակացույցով ժամկետում տեղավորվում ենք, հասցնում ենք մեր աշխատանքը կատարել, ապա չի երկարացվելու, իսկ եթե տեսնենք, որ մեր աշխատանքը չենք ավարտում, կերկարացվեն ժամկետները»,- ասաց նա։
Հիշեցնենք, որ կառավարության կողմից հաստատված նախագծով մասնագիտական հանձնաժողովի կազմում ընդգրկվել են ՀՀ արդարադատության նախարար Ռուստամ Բադասյանը, ՄԻԵԴ-ում ՀՀ ներկայացուցիչ Եղիշե Կիրակոսյանը, Մարդու իրավունքների պաշտպան Արման Թաթոյանը, ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը, «Իմ քայլը» խմբակցության պատգամավոր Վահագն Հովակիմյանը, «Բարգավաճ Հայաստան» խմբակցության պատգամավոր Գևորգ Պետրոսյանը, «Լուսավոր Հայաստան» խմբակցության պատգամավոր Տարոն Սիմոնյանը, ԲԴԽ անդամ Վիգեն Քոչարյանը, իրավաբան-գիտնականներ Անահիտ Մանասյանը, Արթուր Ղամբարյանը, Արմեն Մազմանյանը, Արսեն Թավադյանը, Լևոն Գևորգյանը, Տիգրան Մարկոսյանը, «Իրազեկ քաղաքացիների միավորում» հասարակական կազմակերպության ներկայացուցիչ Դանիել Իոաննիսյանը և «Իրավաբանների հայկական ասոցիացիա» հասարակական կազմակերպության ներկայացուցիչ Կարեն Զադոյանը:
