Նոր տիպի կորոնավիրուսային Covid-19 վարակից առաջին մահն է գրանցվել Վրաստանում: Ըստ Թբիլիսիի առաջին համալսարանական հիվանդանոցի, մահացել է 79-ամյա մի կին, որը հոսպիտալացվել էր մարտի 31-ին և ուղեկցող հիվանդություններ էր ունեցել, փոխանցում է EurAsia Daily-ն:
«Կինը ծանր վիճակում է տեղափոխվել հիվանդանոց: Դժբախտաբար, ցանկացած վիրուսային պաթոլոգիա կարող է բարդացնել նման հիվանդների վիճակը և մեծացնել ճակատագրական ելքը», – ասաց կլինիկայի ղեկավար Լևան Ռատիանիան:
Նա ավելացրեց նաև, որ հիվանդը եղել է Մառնեուլի-Բոլնիսի կլաստերից, վրացական երկու քաղաքից, որտեղ մարտի 21-ին խիստ կարանտին է մտցվել:
Ըստ Վրաստանի հիվանդությունների վերահսկման և կանխարգելման ազգային կենտրոնի ղեկավար Ամիրան Գամկրելիձեի՝ երկրում կորոնավիրուսային դեպքերի աճ է սպասվում: Նա առավել ծանր է համարել ապրիլը և, հավանաբար, մայիսի առաջին կեսը:
«Դեպքերի աճ կլինի: Մենք հնարավորինս ձգեցինք մեկուսացման փուլը Վրաստանում և կանխեցինք վարակի զանգվածային տարածումը: Այս եղանակով մենք ժամանակ ենք շահել և ավելի լուրջ պատրաստել առողջապահության ոլորտը», – ասաց Ամիրան Գամկրելիձեն:
Ապրիլի 4-ին տեղական ժամանակով 15:00-ի դրությամբ հանրապետությունում արձանագրվել է COVID-19 վարակի հաստատված 157 դեպք (ակտիվ փուլում են 127-ը), այդ թվում՝ 28-ը բուժված: 5 526 մարդ գտնվում է կարանտինում, 344-ը` մասնագիտացված ստացիոնար հիվանդանոցներում: