Ապրիլի 5-ին նախատեսված սահմանադրական փոփոխությունների հանրաքվեն, որի ընդունվելու դեպքում պետք է փոխվեր Սահմանադրական դատարանի ներկայիս կազմը, հետաձգվեց կորոնավիրուսի համավարակի պատճառով։
Հայտնի է, որ իշխանությունները սկզբում ձեռնամուխ եղան ակտիվ քարոզչության, շրջագայեցին Հայաստանի մարզերով, «Այո»-ի բուկլետներ բաժանեցին, իրազեկեցին քաղաքացիներին հանրաքվեի անցկացման նպատակահարմարության մասին։
Ի՞նչ շահեցին նախկին իշխանությունների սպասարկող ՍԴ-ի դատավորները հանրաքվեի հետաձգման պատճառով, ի՞նչ քայլեր պետք է անի իշխանությունն այսուհետ։
«Ժողովրդավարական հայրենիք» կուսակցության նախագահ Պետրոս Մակեյանը հիշեցնում է, որ ինքն այլ կարծիքի է եղել, քան իր կուսակցության այլ անդամներ, ինչի պատճառով էլ տարակարծություններ է ունեցել նրանց հետ։
«Ես կողմ էի, որ Սահմանադրական դատարանի դատավորներին, որոնք մեղսակից են եղել տարիներ շարունակ մեր երկրում տեղի ունեցող ապօրինություններին, ՀՀ քրեական օրենսգրքի հոդվածներով ենթարկվեն պատասխանատվության, ոչ թե կենսաթոշակով հեռանալու տարբերակ առաջարկեին կամ էլ փորձեին հանրաքվեով հեռացնել նրանց։ Այն, ինչ նախաձեռնեց իշխանությունը, կարծում եմ, չարյաց փոքրագույնն էր, ապրիլի 5-ի հանրաքվեն հետաձգվեց։ Բայց իշխանությունն էլ պետք է փոխի գործելաոճը, հստակություն մտցնի, մտածի Սահմանադրության ամբողջական փոփոխության մասին։ Հանրաքվեի հետաձգումից շահեց իշխանությունը»,-«Առաջին լրատվական»-ի հետ զրույցում ասաց Պետրոս Մակեյանը։
ԺՀԿ նախագահը կարծում է, որ պետք է տեղի ունենա նաեւ կառավարման համակարգի փոփոխություն, վերադարձ կատարվի կիսանախագահական համակարգին։
«Մեր երկիրը գտնվում է պոտենցիալ պատերազմական իրավիճակում։ Սրանից զատ՝ քաղաքական դաշտը կայացած չէ, դեռեւս 90-ականներից խորհրդարանը ենթարկվում է դեգրադացիայի։ Խորհրդարանական համակարգը լուրջ համակարգ է, սակայն դրա կիրառմանը կարող ենք հասնել տասնամյակներ հետո, ժողովրդավարության ավանդույթներ հաստատելուց հետո»,- ասաց Պետրոս Մակեյանը։
