Այս օրերին Ռուսաստան արտագնա աշխատանքի մեկնած մեր հարյուրավոր քաղաքացիներ կանգնած են Հայաստան վերադառնալու խնդրի առջև: Այս պահին նրանք զրկվել են աշխատանքից և կանգնած են սոցիալական խնդիրների առջև՝ բնակարանների վարձավճարների, ինչպես նաև սննդի ձեռքբերման հետ կապված: Մոսկվա արտագնա աշխատանքի մեկնած Մկրտիչը «Առաջին լրատվական»-ի հետ զրույցում նշեց, որ այս պահին սպասողական վիճակում են: Նա նշեց, որ սա առաջին տարին էր, որ որոշել էր մեկնել արտագնա աշխատանքի, քանի որ դեկտեմբերից անցել է կենսաթոշակի: Նա պատմեց, որ Մոսկվա արտագնա աշխատանքի էին մեկնել խմբով՝ 4 հոգով: Նա նշեց, որ Մոսկվա են մեկնել մարտի 16-ին, աշխատել են երկու օր, որից հետո հայտարարվել է արտակարգ դրություն: Դեպքերի նման զարգացում նրանք չէին կանխատեսել:
Ընկերոջ խորհրդով բարեկամների հետ Մոսկվա արտագնա մեկնած Մկրտիչը նշեց, որ ինքը պատրաստ էր մի քիչ էլ մնալ Մոսկվայում, բայց երեք ընկերները չեն կարող մնալ, անգամ սնունդ ձեռք բերելու խնդրի առաջ կկանգնեն: Նաև հավելեց, որ կորոնավիրուսը նոր թափ է հավաքել Մոսկվայում, հարյուրներով ավելանում է վարակակիրների թիվը: Միայն Մոսկվայում հիվանդների թիվն անցել է 550-ից:
Հունվարի 15-ին արտագնա աշխատանքի մեկնած Գևորգն էլ աշխատել է մեկ ամիս, որից հետո, մեկը մյուսի հետևից, սկսել են փակվել շինարարական օբյեկտները: Այս պահին անգամ աշխատողների գումարները չեն վճարվել: Այս պահին տոմս չկա, որ վերադառնա Հայաստան: Նա Մոսկվայում է տիկնոջ հետ, իսկ երեխաները տատիկի հետ Երևանում են, ու հիմա չգիտեն՝ ինչպես հասնել երեխաներին։ «Հիմա չգիտենք՝ ոնց վերադառնանք հայրենիք: Մենք մեքենայով ենք, և եթե Վրաստանը մեզ տրանզիտ տար, մենք մեր մի քանի այլ հայրենակիցների հետ կվերադառնայինք: Մենք ընդամենը մեր տան ճանապարհն ենք ուզում, ընդամենը ճանապարհ»,- ասաց Գևորգը:
Նա նշեց տասնյակ հայերի, որոնք ցանկանում են վերադառնալ Հայաստան, անընդհատ իրար հետ կապի մեջ են: Սա առաջին տարին էր, որ Գևորգը Մոսկվա էր մեկնել արտագնա աշխատանքի: Դրանից առաջ ամեն տարի Անապա է մեկնել աշխատանքի: Գևորգի խոսքերով՝ Հայաստանում աշխատանք գտնելը բարդ է, բայց այս համավարակն էլ փաստի առաջ է կանգնեցրել բոլորին:
Մոսկվայում իր ընկերների հետ վարսավիրությամբ զբաղվող Լիլիթն էլ «Առաջին լրատվական»-ի հետ զրույցում նշեց, որ արդեն 4-րդ տարին է, ինչ Մոսկվայում է աշխատում: Դեկտեմբերից Մոսկվայում են, և ինչպես ինքն է ասում՝ եկել էին աշխատելու, պարտքերը փակելու համար: Սակայն հիմա աշխատանք չկա, սպասում են չվերթի Հայաստան վերադառնալու համար: Հայաստան վերադառնում են, որ գոնե տան վարձ չտան Ռուսաստանում:
«Փողոցում չմնալու համար ենք Հայաստան գալիս: Մենք Ռուբլյովկայի մոտ ենք մնում, իբր ասում են՝ ամբողջ Ռուբլյովկան կորոնավիրուս է, ասում են՝ քանի որ հարուստ թաղամաս է, այստեղից տարվա մեջ մի քանի անգամ մեկնում են Եվրոպա, վիրուսն այնտեղից են բերել: Ես ասում եմ՝ սա անիմաստ է, մենք այսքան շփվել ենք մարդկանց մեջ, մի հատ կորոնավիրուս չտեսանք: Ես հիմա էլ կգնայի աշխատելու, եթե արգելած չլինեին: Ժիրինովսկու քրոջ աղջիկն իմ հաճախորդն է, ասում է՝ այս ամենը սուտ է: Ամսի քսանին մեր տան վարձի ժամանակն է, չենք կարող մուծել, Հայաստանից էլ այսօր որևէ մեկը չի կարող օգնել: Մեզ փող պետք չի, մենք տոմսի գումարն ունենք, միայն թե չվերթ լինի՝ հասնենք Հայաստան»,- ասաց նա: Նա նշեց, որ եթե Հայաստանում աշխատանքի հարցը կարողանար լուծել, Հայաստանից դուրս չէր գա:
ԱԺ անկախ պատգամավոր Արման Բաբաջանյանն էլ «Ֆեյսբուք» սոցիալական ցանցում գրառում էր արել, որ ՌԴ-ում մեր համաքաղաքացիների տվյալներով լրացված ցուցակները արդեն փոխանցել է Ռուսաստանում Հայաստանի դեսպան Վարդան Տողանյանին, և տվյալների հիման վրա դեսպանատան աշխատակիցները կապ կհաստատեն մեր հայրենակիցների հետ առաջիկա օրերին սպասվող չարտերային չվերթներով նրանց վերադարձը դեպի հայրենիք կազմակերպելու նպատակով:
Լուսանկարը՝ Armeniasputnik-ի
