Այն, որ համաշխարհային տնտեսությունն անկում է ապրում և դեռ շարունակվելու է, ֆինանսական վերլուծական հաստատություններն են պնդում։ Բնականաբար, այդ անկումը պայմանավորված է աշխարհին պատուհասած համաճարակով, որից անմասն չի մնացել Հայաստանը։
ՀՀ կառավարությունը նախաձեռնել է աջակցության մի քանի փաթեթներ, որոնք վերաբերում են տնտեսվարողներին և սոցիալական տարբեր խմբերին։ Ինչպե՞ս եք աջակցելու փոքր ու միջին բիզնեսին․ «Առաջին լրատվական»-ի հարցին էկոնոմիկայի փոխնախարար Նաիրա Մարգարյանը պատասխանեց․ «Փոքր ու միջին բիզնեսի համար հատուկ աջակցության գործիք ունենք։ Այն նախատեսում է տնտեսվարող սուբյեկտներին տրամադրել վարկեր, որոնք, սակայն, ստանդարտ պայմաններով չեն։ Մասնավորապես, վարկերը կարող են տրամադրվել մինչև երեք տարի ժամկետով, սակայն առաջին երկու տարին՝ բոլորովին անտոկոս։ Երրորդ տարվանից տնտեսվարողն այդ վարկի համար կվճարի 12 տոկոս։ Այսինքն՝ եթե տնտեսվարողը ցանկություն հայտնի վերցնել վարկ և մարել առաջին երկու տարվա ընթացքում, ապա դա նրա համար կլինի բոլորովին անվճար վարկ»։
Վարկեր, այն էլ անտոկոս։ Այս ամենը շատ գայթակղիչ է հնչում, բայց սրանք ի՞նչ վերլուծությունների հիման վրա են հիմնված, որովհետև համաճարակով պայմանավորված խիստ սահմանափակումների կամ արտակարգ դրության երկարաձգման պայմաններում, որքան էլ վարկն անտոկոս լինի, միևնույն է գալու է դրա վճարման ժամանակը․ «Առաջին լրատվական»-ի հարցին Նաիրա Մարգարյանը պատասխանեց․ «Միանշանակ։ Նման օժանդակության ծրագրերի իմաստն այն է, որ լիկվիդայնության բարձիկ նետենք տնտեսվարողին, որպեսզի առաջիկա ամիսներին կարողանան կատարել իրենց պարտավորությունները և դիմանան այս իրավիճակում ու կարողանան վերականգնել իրենց բնականոն գործունեությունը՝ ինչպիսին, որ այն կլինի համաճարակից հետո»։
Մանրամասները՝ տեսանյութում։