Լուրեր
Կորոնավիրուսի հաղթահարումից հետո տագնապային խնդիրները ավելի ակնհայտ կդրսևորվեն
  • 21:30
  • 2020-04-05
  • Դիտումներ՝ *

Ամբողջ աշխարհը կորոնավիրուսով պայմանավորված լրջագույն մարտահրավերների առաջ է կանգնած. կանխատեսվում է, որ կորոնավիրուսի հաղթահարումից հետո ճգնաժամերն էլ ավելի են շատանալու. տնտեսական, ֆինանսական, մշակութաբանական, ինչպես նաև հոգեբանական ճգնաժամեր են սպասվում մարդկությանը: Թեմայի շուրջ «Առաջին լրատվական»-ը զրուցել է հոգեբան, հոգեթերապևտ Արման Բեգոյանի հետ:

Անդրադառնալով դիտարկմանը, որ Չինաստանում կտրուկ աճել է ամուսնալուծությունների թիվը, Արման Բեգոյանը նշեց, որ կորոնավիրուսի համաճարակով պայմանավորված իրավիճակը խթանել է այն պրոցեսների ընթացքը, որոնք այսպես թե այնպես ընթանում էին, բայց դանդաղ:

Հոգեբանի դիտարկմամբ՝ մեկուսացումն այնքան էլ մեծ նշանակություն չունի մարդու միայնակության զգացման հետ. «Ոմանք իրենց միայնակ են զգում նույնիսկ երբ որ շատ մարդկանց հետ են շփվում: Այս համաճարակի հետ կապված մեկուսացումը բոլոր ասպեկտներով առերեսում է եղած խնդիրների հետ, այդ թվում կարող է լինել նաև միայնակության զգացումը»:

Արման Բեգոյանի կարծիքով՝ սոցիալական շփումները կարևոր են հատկապես էքստրովերտ, ակտիվ բնույթ ունեցող մարդկանց համար. «Եթե մարդն էքստրովերտ է, նրա համար մեկուսացումը դժվար կլինի»: Հոգեբանի խոսքով՝ բացահայտումներ են արվել այն մասին, որ մարդու երկարակեցությանը նպաստող կարևոր գործոններից է սոցիալական շատ շփումներ ունենալը:

«Արտակարգ դրությամբ պայմանավորված ինքնամեկուսացումը կարող է ամեն մեկիս առերեսել մեր վախերի հետ, դրանք կարող են տարբեր լինել: Հետհամաճարակային շրջանում կարող է աճել հուզական խանգարումների, տրամադրության աֆեկտիվ խանգարումների, տագնապային տարաբնույթ խնդիրների թիվը: Խնդիրներ կարող են առաջանալ՝ կապված ապագայի անորոշության հետ. անորոշությունն ինքնին ամենամեծ տագնապային գործոններից մեկն է: Տագնապը պաշտպանական ռեակցիա է»,- նշեց հոգեբանը: Նա նաև ընդգծեց, որ պետք է ռազմավարություն մշակել, որով հոգեկան առողջության մասնագետները բնակչությանը ծառայություն կմատուցեն, որպեսզի տագնապային խնդիրները չարմատավորվեն:

Մանրամասն՝ տեսանյութում:

  • Դիտումներ՝ *