«Բազմիցս եմ ասել, որ ֆորս-մաժորային իրավիճակում անպայման պետք է ազգային փոխադրող ունենանք։ Բազմիցս եմ ասել, որ աղետների, պատերազմների ժամանակ օտարները չեն թռնելու, Ryanair-ն ու Wizz-air-ը առավել ևս չեն թռնելու»,- «Առաջին լրատվական»-ի հետ զրույցում ասաց քաղավիացիայի նախկին ղեկավար Շահեն Պետրոսյանը՝ անդրադառնալով այս օրերին կորոնավիրուսի պատճառով հայտարարված արտակարգ դրությանը և այդ հիմքով սահմանների ու թռիչքների սահմանափակումներին։
Շահեն Պետրոսյանի խոսքով՝ վաղուց պետք է ազգային փոխադրող ստեղծվեր, որով այսօր գոնե բեռներ հնարավոր կլիներ փոխադրել կամ փոխադրել այլ երկրներում այսօր մնացած, բայց հայրենիք վերադառնալ ցանկացող մեր հայրենակիցներին։ «Ճիշտ է, այդ սահմանափակումները բոլոր երկրներում է, բայց կարելի է դրանից օգտվել ու լիզինգով կամ վարձակալության հիմունքներով շատ էժան ինքնաթիռներ վերցնել բեռներ փոխադրելու համար։ Բայց եթե մենք մեր սեփականը ունենայինք, ապա պետությունն այդ բեռը կվերցներ իր վրա, և մեր օդանավերով բեռներ կփոխադրեինք, ու Լարսում այսօրվա վիճակը չէր լինի։ Ճիշտ է, ավելի ծախսատար կլիներ, բայց պետությունը կարող էր դա իր վրա վերցնել։ Այդ օդանավերով հանգիստ կարելի էր ներկրում և արտահանում իրականացնել։ Բայց դե անհույս է։ Սա արդեն երրորդ կառավարությունն է, որը թքած ունի ազգային փոխադրող ունենալու վրա»,-ասաց Պետորսյանը՝ հավելելով, որ ոչ մի հույս չունի, որ անգամ դրանում գործնականում համոզվելուց հետո կառավարությունն այդ ուղղությամբ քայլեր կձեռնարկի:
«Իրենք ոգևորված են իրենց հրաշաաղջիկով, որն էլ թողեց գնաց։ Չգիտեմ՝ ինչ կլինի։ Ավիացիայից հիմա ոչ մի տեղեկություն չկա, ղեկավարություն չկա, անորոշ վիճակ է։ Գոնե հրաժարական տար նոր գնար՝ կհասկանայինք։ Թե չէ հիմա անտեր վիճակ է այդ համակարգում։ Եվ ես ուղղակի զարմանում եմ այս անտարբերության վրա»,- ասաց Պետրոսյանը։
Ավիացիոն խորհրդատու Նավիկ Խաչատրյանը նույնպես պնդում է, որ հենց նման իրավիճակներում է ակնհայտ դառնում ազգային փոխադրողի անհրաժեշտությունը։ Նրա խոսքով՝ այս իրավիճակի կարգավորումից հետո ճիշտ տարբերակն այն է, որ Ազգային ժողովը որոշում ընդունի բաց երկինքը փակելու վերաբերյալ և բոլոր պետությունների հետ շփվի միայն միջպետական երկկողմանի պայմանագրով, այդ թվում նաև՝ Ռուսաստանի հետ: «Դա միակ գրավականն է, տարբերակն է, որպեսզի Հայաստանում ազգային փոխադրող ստեղծվի»,- ասաց Խաչատրյանը։
Հաջորդ քայլը, մեր զրուցակցի խոսքով, պետք է լինի Ավիացիայի մասին օրենքի փոփոխությունը: «Շատ մեծ փոփոխություններ պետք է արվեն՝ ընդհուպ արգելվի որևէ ոչ մասնագետ մարդու հայտնվելը այդ համակարգում։ Այդ համակարգում պաշտոն զբաղեցնելու համար համապատասխան կրթության պահանջը պետք է պարտադիր լինի։ Ամեն մեկը չի կարող հայտնվել ավիացիայի ոլորտում։ Այդ բոլորից հետո, երբ որ օրենսդրական դաշտը նորմալ լինի, նոր պետք է ստեղծել ուժեղ մասնագետների մի խումբ, որը կսկսի կադրերը հավաքել, ապա դրանից հետո նոր ձեռնամուխ լինել ազգային փոխադրողի ստեղծմանը։ Կորոնավիրոսի հաղթահարումից հետո հաջորդող 1.5 տարին կարելի է պատրաստվել դրան»,- ասաց Խաչատրյանը։
Նրա խոսքով՝ առանց բաց երկնքի քաղաքականությունը մերժելու հնարավոր չէ ազգային փոխադրող ստեղծել, քանի որ այդ պարագայում ազգային փոխադրողը կկարողանա մրցակցել նույն Աերոֆլոտի հետ, իսկ մրցակցության պարագայում գները կնվազեն մինչև 50 տոկոսով կամ միանշանակ կլինեն ավելի ցածր, քան ներկայում են։
